ԱՊՀ ինը երկրների, այդ թվում նաև Ադրբեջանի ՆԳՆ ներկայացուցիչները ժամանել են Երևան

ԱՊՀ ինը երկրների, այդ թվում նաև Ադրբեջանի ՆԳՆ ներկայացուցիչները ժամանել են Երևան՝ մասնակցելու հոկտեմբերի 14-ին կայանալիք Անկախ պետությունների համագործակցության մասնակից պետությունների ներքին գործերի նախարարների խորհրդի հերթական նիստին, հաղորդում է ՀՀ ոստիկանության մամուլի ծառայությունը:

«Նիստի  ընթացքում կքննարկվեն հանցավորության դեմ պայքարում ԱՊՀ մասնակից երկրների ներքին գործերի մարմինների հետագա համագործակցության կատարելագործմանն ու համակարգմանը վերաբերող հարցեր», - նշվում է տեղեկատվության մեջ:

Ինչպես հաղորդում է «ՌԻԱ Նովոստին», նիստին մասնակցում է Ադրբեջանի ներքին գործերի նախարար Ռամիլ Ուսուբովը:

Նիստի մասնակիցները կքննարկեն նաև տեղեկատվական տեխնոլոգիաների օգտագործմամբ հանցավորության դեմ պայքարի ոլորտում ԱՊՀ երկրների համագործակցության հայեցակարգը, հանցագործությունների իրեղեն ապացույց հանդիսացող թմրանյութերի, զենք-զինամթերքի փոխանցման մեխանիզմների մասին արձանագրության նախագիծը, ԱՊՀ ստեղծման 20-ամյակի հետ կապված խորհրդի միջոցառումները:-0-