Հայկական դպրոցներում բռնության տեսանյութերի հայտնվելը վկայում է քաղաքացիական հասարակության ստեղծման մասին. պատգամավոր

Ինտերնետում տեղադրված տեսանյութերում ուսուցիչների կողմից հայ աշակերտների ծեծի կադրերը վկայում են հասարակության առողջացման մասին, այդ կարծիքին է ՀՀ խորհրդարանի պատգամավոր, «Ժառանգություն» ընդդիմադիր խմբակցության անդամ Անահիտ Բախշյանը։

«Մեր դպրոցականները սկսել են պաշտպանել իրենց արժանապատվությունը, և ըստ էության՝ այս դեպքերը ժողովրդավարական քաղաքացիական հասարակության առաջին սաղմերն են»,- երեքշաբթի լրագրողներին ասաց նա։

Ուսուցչուհու կողմից մի քանի դպրոցականներին ծեծի ենթարկելու կադրերով տեսանյութն օրերս տեղադրվել է Youtube կայքում։ Սա արդեն ամսվա սկզբից երկրորդ համանման դեպքն է։ Նախօրեին ՀՀ կրթության և գիտության նախարար Արմեն Աշոտյանը հայտնեց, որ ցավալի միջադեպի «հերոսուհին» Երևանի Արաբկիր համայնքի դպրոցներից մեկի ուսուցչուհին է, մեկ շաբաթ առաջ ազատվել է իր զբաղեցրած պաշտոնից՝ սեփական դիմումի համաձայն։

Ըստ Բախշյանի՝ դպրոցներում պետք է աշխատեն այն ուսուցիչները, ովքեր առաջին հերթին հարգում են երեխայի արժանապատվության զգացումը։

«Խորհրդային և ժամանակակից մանկավարժությունը հակասում են միմյանց, իսկ ներկա հայ ուսուցիչների մեծամասնությունը հին խորհրդային դպրոցի ներկայացուցիչներ են, իսկ այդ համակարգը, մասնավորապես, ավտորիտարիզմ էր ենթադրում, և եթե Youtube-ը 15-20 տարի առաջ լիներ, այս տեսանյութերն ավելի շատ կլինեին»,- ասաց նա՝ ընդգծելով նոր կադրերի պատրաստման կարևորությունը։

«Նոր կադրերի պատրաստմամբ պետք է զբաղվի Հայկական պետական մանկավարժական համալսարանը, բայց տեսնելով, թե ինչպիսի կադրեր են այսօր այնտեղից դուրս գալիս, ակամա ցանկություն է առաջանում ընդհանրապես փակել այս համալսարանը»,- ասաց Բախշյանը։

«Այգ» հոգեբանական ծառայությունների կենտրոնի գլխավոր մասնագետ, Հայկական պետական մանկավարժական համալսարանի դասախոս Ռուբեն Պողոսյանն իր հերթին նշեց, որ ուսուցիչն առաջին հերթին պետք է ուսուցչի կոչում ունենա և կարողանա հարգել երեխային։

«Մեր ուսուցիչները շատ վատ են ծանոթ աշակերտների տարիքային յուրահատկություններին, ինչը նման միջադեպերի է հանգեցնում»,- ասաց հոգեբանը՝ ավելացնելով, որ պետք է փնտրել ոչ թե մեղավորներին, այլ խնդրի լուծման ճանապարհը։

«Իմ համոզմամբ՝ պետք է անձնական որակների թեստավորման համակարգ ստեղծել այն ուսանողների համար, ովքեր ցանկանում են ուսուցիչ դառնալ, և այնուհետև այդ թեստերի արդյունքների հիման վրա որոշել, թե մանկավարժության մասնագիտական պահանջներին համապատասխանում է այս կամ այն մարդը»,- եզրափակեց նա։ -0-