Թուրքիային չհաջողվեց Հայաստանին իր քաղաքական խաղի մեջ ներքաշել՝ կապված Սուրբ Խաչի պատարագի հետ, կարծում է Հանրային Խորհրդի պատմական-ազգային արժեքների, հուշարձանների պահպանության, պատկանելության և օգտագործման հարցերի ենթահանձնաժողովի ղեկավար Ժասմեն Ասրյանը։
Գրեթե հարյուր տարի անց առաջին ժամերգությունն Ախթամար կղզու Սուրբ Խաչ հայկական եկեղեցում տեղի ունեցավ սեպտեմբերի 19-ին։ Մայր Աթոռ Սուրբ Էջմիածինը պաշտոնապես հրաժարվեց պատարագին մասնակցել, քանի որ թուրքական կողմը խոստումներին հակառակ եկեղեցու գմբեթին խաչ չտեղադրեց։
«Մեր ընդվզումով մենք ապացուցեցինք Թուրքիային, որ լավ ենք հասկանում թուրքական քաղաքական խաղի էությունը՝ աշխարհին ցույց տալ, թե որքան է Անկարան անհանգստացած իր տարածքում գտնվող ազգային փոքրամասնությունների խնդիրներով»,- ուրբաթ լրագրողներին ասաց Ասրյանը՝ ավելացնելով, որ այժմ թուրքական կողմն առավել մանրակրկտորեն է ամեն ինչ կկշռադատի, նախքան կրկին անգամ հայերին իր խաղի մեջ ներքաշելու փորձ կատարելը։
Ըստ փորձագետի, պատարագը բոյկոտելու արշավը հասել է իր նպատակին։ «Ինձ հպարտության զգացում է պատում, որ հայկական հասարակությունն ինչպես սփյուռքում, այնպես էլ Հայաստանում, միաձայն հրաժարվեց Թուրքիայի քաղաքական խաղին մասնակցելուց»,- ասաց նա։
Ասրյանի կողմից գլխավորած ենթահանձնաժողովն առաջիններից մեկն էր, որ հայ ժողովրդին կոչ արեց չմասնակցել «թուրքական խաղին»։
«Այս հարցը շատ կարևոր նշանակություն ունի ինչպես ամեն մի հայի, այնպես էլ Հայաստանի արտաքին քաղաքականության համար, և բնական է, որ մեր ենթահանձնաժողովը չէր կարող դիտորդ մնալ»,- ասաց Ասրյանը։
Ենթահանձնաժողովի անդամ, պատմաբան Ռաֆիկ Թադևոսյանն իր հերթին հայտնեց, որ պատարագի ողջ արարողությունը և դրան նախորդող իրադարձությունները հատկապես քաղաքական նպատակներ էին հետապնդում, և սխալ են նրանք, ովքեր չեն ցանկանում քաղաքականացնել այս հարցը։
«Եթե ինչ-որ մեկը չի ցանկանում այստեղ քաղաքականություն տեսնել, դա չի նշանակում, որ այն չկա, պարզապես այն կրոնի դիմակի տակ է թաքնվել»,- ասաց նա։ -0-
