Հայաստանի կողմից ԼՂՀ-ի ճանաչումը որևէ կերպ չի անդրադառնա հակամարտության կարգավորման վրա. փորձագետ

Հայաստանի կողմից ԼՂՀ-ի ճանաչումը շատ բան կփոխի երկրի ներքաղաքական կյանքում, սակայն որևէ կերպ չի անդրադառնա ղարաբաղյան հակամարտության կարգավորման գործընթացի վրա, կարծում է Կովկասի ինստիտուտի տնօրեն Ալեքսանդր Իսկանդարյանը:

«Հայկական կողմի դիրքորոշումը դրանից չի ամրանա: Կճանաչի Հայաստանը ԼՂՀ-ն, թե ոչ, մեծ հաշվով, նշանակություն չունի կարգավորման գործընթացի համար», - ասաց Իսկանդարյանը:

Նրա կարծիքով՝ աշխարհում կան պետություններ, որոնք սակարկում են չճանաչված պետությունները ճանաչելու գործընթացը, սակայն նրանց ճանաչումը ևս ոչինչ չի նշանակում:

«Տեսականորեն կարելի է հասնել նրան, որ մի քանի երկրներ ճանաչեն ԼՂՀ-ն, սակայն դա ոչինչ չի նշանակի: Իրական նշանակություն կունենա ԱՄՆ-ի Ռուսաստանի, Ֆրանսիայի, ԵՄ երկրների կողմից ճանաչումը, սակայն դա, իմ կարծիքով, անհնար է», - ընդգծեց քաղաքագետը:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-