Հայկական վիրտուալ համալսարանը կարող է նպաստել սփյուռքի կողմից հայագիտության ուսումնասիրությանը

ԵՐԵՎԱՆ, 30 հունիսի. /Նովոստի-Արմենիա/. Հայկական վիրտուալ համալսարանը (ՀՎՀ) կարող է նպաստել սփյուռքի կողմից հայագիտության ուսումնասիրությանը, ասաց քոլեջի հիմնադիր տնօրեն Երվանդ Զորյանը «Արի տուն» ծրագրի մասնակիցների հետ հանդիպման ընթացքում։ 

2009 թվականին ստեղծված հայկական վիրտուալ համալսարանը Հայկական Համընդհանուր Բարեգործական Միության կրթական հաստատությունն է, որն իր առաջատար մեթոդների շնորհիվ նոր ավանդ է մտցնում կրթության ոլորտ։ ՀՎՀ-ի նպատակն է հայագիտության հիմնարար կրթություն ստանալ ցանկացողներին հնարավորություն ընձեռել օն-լայն ռեժիմում։

«Այսօր, ցավոք, սփյուռքի ոչ բոլոր համայնքներում կան դասական հայկական դպրոցներ։ Սփյուռքի դասական հայկական դպրոցներում կարող է սովորել հայկական բնակչության միայն 5 տոկոսը»,- չորեքշաբթի լրագրողներին ասաց Զորյանը։

Միաժամանակ նա նշեց, որ այսօր հասանելի Ինտերնետի լայն հնարավորությունները թույլ են տալիս սփյուռքի հայ երիտասարդությանը սովորելու վիրտուալ դպրոցում։

«Այս ծրագրի մասնակիցները հարմար տարիք ունեն մեր դպրոցում սովորելու համար»,- ասաց Զորյանը։

Նա նշեց, որ դպրոցը գործում է արդեն մեկ տարի, և այդ ժամանակահատվածում ուսում է ստացել 16-81 տարեկան ավելի քան 55 շրջանավարտ։

Ներկայում ՀՎՀ-ում գործում է երեք ֆակուլտետ՝ հայոց լեզվի, պատմության և մշակույթի, որոնցից յուրաքանչյուրն առաջարկում է գիտելիքների տարբեր մակարդակների համապատասխանող մի շարք դասընթացներ։ Ծրագիրը ներկայացված է 6 լեզվով՝ անգլերեն, հայերեն (արևելահայերեն և արևմտահայերեն), ռուսերեն, ֆրանսերեն և իսպաներեն։

Այցելության շրջանակներում «Արի տուն» ծրագրի մասնակիցները դասախոսություն են լսել հայոց լեզվի ստեղծման պատմության թեմայով։ -0-