Հայաստանը ոչ մի դեպքում չպետք է քվեարկի Իրանի նկատմամբ պատժամիջոցների կիրառման օգտին, ասաց Հայ հեղափոխական դաշնակցության խորհրդարանական խմբակցության ղեկավար Վահան Հովհաննիսյանը:
ՄԱԿ-ի Անվտանգության խորհուրդը հունիսի 9-ին կողմ է քվեարկել ուրանի հարստացման աշխատանքները չդադարեցնելու պատճառով Իրանի նկատմամբ պատժամիջոցների կիրառմանը: Փաստաթղթին աջակցել են Անվտանգության խորհրդի 12 անդամ, Թուրքիան և Բրազիլիան դեմ են քվեարկել, Լիբանանը ձեռնպահ է մնացել: Սա թվով չորրորդ բանաձևն է, որն ընդունում է Անվտանգության խորհուրդը Թեհրանի կողմից միջուկային ծրագրին վերաբերող միջազգային պահանջները չկատարելու կապակցությամբ:
«Հարցը լուծվել է Անվտանգության խորհրդում, և ՄԱԿ-ի Գլխավոր ասամբլեայի լիագումար նիստի օրակարգ այդ հարցի ներառման դեպքում Հայաստանը ոչ մի դեպքում չպետք է քվեարկի պատժամիջոցների կիրառման օգտին», - ասաց Հովհաննիսյանը` ընդգծելով, որ սա իր անձնական կարծիքն է, այլ ոչ թե պետության կամ ՀՅԴ-ի դիրքորոշումը:
Նա նշեց, որ Հայաստանն առաջին հերթին պետք է հաշվի առնի Իրանի հետ ընդհանուր սահմանի առկայությունը:
«Մենք չգիտենք, թե ինչ բնույթ են կրելու այդ պատժամիջոցները, որոնք կարող են տնտեսական տեսակետից վնասել նաև մեր երկրի շահերին, և այդ պատճառով մենք չպետք է կողմ հանդես գանք Իրանի նկատմամբ պատժամիջոցների կիրառմանը», - ասաց Հովհաննիսյանը:
Հայաստանը տնտեսական շրջափակման մեջ է Ադրբեջանի կողմից ղարաբաղյան հակամարտության լուծված չլինելու պատճաոռվ, ինչպես նաև` Թուրքիայի կողմից, որի հետ Երևանը չունի դիվանագիտական հարաբերություններ, իսկ պետական սահմանը փակ է 1993 թ.-ից` պաշտոնական Անկարայի նախաձեռնությամբ: Հայաստանից բեռների տեղափոխման միակ ուղիներն անցնում են Վրաստանով և Իրանով:-0-
