Հայաստանը «ձիու քայլ» կատարեց Թուրքիայի հետ շախմատային դիվանագիտությունում. փորձագետ

Հայաստանը «ձիու քայլ» կատարեց Թուրքիայի հետ շախմատային դիվանագիտությունում՝ տանուլ չտալով հայ-թուրքական ռաունդը, կարծում է քաղաքագետ, փիլիսոփայական գիտությունների դոկտոր, Երևանի պետական համալսարանի պրոֆեսոր Ալեքսանդր Մանասյանը։ 

«Սա ոչ թե ֆուտբոլային դիվանագիտություն է, այլ շախմատային։ Մենք «ձիու քայլ» կատարեցինք, իսկ Թուրքիան անպատրաստ գտնվեց այդ քայլին»,- eրեքշաբթի լրագրողներին ասաց Մանասյանն՝ ամփոփելով նախագահի բրյուսելյան այցի արդյունքները։

Ըստ նրա` Հայաստանը տանուլ չի տվել հայ-թուրքական ռաունդը գոնե այն պատճառով, որ ամբողջ աշխարհում քննարկվում էր Հայոց ցեղասպանության խնդիրը։

Քաղաքագետի խոսքերով` Հայաստանի արտաքին քաղաքականությունում բեկում է նկատվում, շեշտադրումներն արված են ակտիվ նախաձեռնողական քաղաքականությանը։

«Եթե նստենք և ոչինչ չանենք, ապա արդյունք չենք ստանա»,- ասաց Մանասյանը։

Խոսելով եվրոպական մոտեցման մասին՝ քաղաքագետը նշեց, որ գիտական, քաղաքական և լրագրողական շրջանակներում որոշ չաձով պարզամիտ վերաբերմունք է նկատվում Եվրոպայի նկատմամբ։ «ԵՄ-ն հզոր կառույց է և լուրջ խաղացող, որի ցանկացած քայլ պայմանավորված է և բխում է Եվրոպայի շահերից, և այստեղ պատահական քայլեր չկան»,- ասաց Մանասյանը։

Ըստ նրա, սա արտացոլվում է նրանում, որ Եվրոպան մղում է Թուրքիային Հայաստանի հետ հարաբերությունների բարելավմանը և ցանկանում է ընդգրկել Հայաստանն ու Ադրբեջանը համատեղ նախագծերում։

«ԵՄ-ն կարող է ավանդ ունենալ հակամարտության կարգավորման մեջ՝ դրանով իսկ բարձրացնելով իր հեղինակությունը որպես կարգավորման գործոն»,- ասաց Մինասյանը։

Միաժամանակ նա նշեց, որ մյուս երկու ուժեղ խաղացողները Ռուսաստանն ու ԱՄՆ-ն են։

«Ցանկանում ենք, թե ոչ, Մոսկվա և Վաշինգտոն կատարած այցերն անհրաժեշտ են, և որքան հաճախ դա լինի, այնքան ավելի շուտ մենք կզգանք մեր քաղաքականության զարկերակը»,- ասաց փորձագետը։ -0-