ԵՐԵՎԱՆ, 12 մայիսի. /Նովոստի-Արմենիա/. Հայաստանի տարածքում գրանցված 47 կարուսելներից միայն 13-ն է անցել անվտանգության փորձաքննություն, տեղեկացրել է ՀՀ ԱԻՆ Տեխնիկական անվտանգության ազգային կենտրոնի տնօրեն Աշոտ Պետրոսյանը:
«47 կարուսելից միայն 13-ն է փորձաքննություն անցել, մնացած կարուսելները փորձաքննության չեն ենթարկվել.....Ես կոչ եմ անում ձեզ չխաղալ երեխաների կյանքի հետ և չնստել վտանգավոր կարուսելներ», - երեքշաբթի մամուլի ասուլիսի ժամանակ հայտարարել է Պետրոսյանը:
Ինչպես տեղեկացրել է կենտրոնի տնօրենը, գրանցված կարուսելներից 44-ը գործում են Երևանում: Պետրոսյանի տվյալներով, Հայաստանի մայրաքաղաքում են գտնվում փորձաքննություն անցած բոլոր 13 կարուսելները:
Նրա խոսքերով, հանրապետության տարածքում գրանցված կարուսելներ են գործում նաև Կապանում և Վանաձորում: Ընդ որում, ինչպես տեղեկացրել է Պետրոսյանը, Կապանի կարուսելները փորձաքննության ժամանակ բացասական արդյունք են ստացել, իսկ Վանաձորի կարուսելներն ընդհանրապես փորձաքննության չեն ենթարկվել:
Ինչպես նշեց փորձագետը, ոչ բոլոր կարուսելներն են անվտանգ շահագործման փորձաքննություն անցնում, այլ միայն բարձր վտանգ ներկայացնող օբյեկտները: Կենտրոնի տնօրենն ավելացրել է, որ Հայաստանում կարուսելների փորձաքննությամբ զբաղվում է ոչ միայն ազգային կենտրոնը, այլև՝ սահմանափակ պատասխանատվությամբ երեք մասնավոր ընկերություններ:
Պետրոսյանը կոչ է արել երեխաների ծնողներին հատուկ ուշադրություն դարձնել կարուսելների անվտանգությանը: Նա նշել է, որ անվտանգությունը կարելի է նաև ինքնուրույն որոշել՝ ուշադրություն դարձնելով կոնստրուկցիաների մաշվածությանը, ժանգի առկայությանը: Կենտրոնի տնօրենն ավելացրել է, որ Երևանի Հաղթանակի զբոսայգու ոչ մի կարուսել փորձաքննության չի ենթարկվել:
Հաղթանակի զբոսայգում մայիսի 9-ին «Թայֆուն» կարուսելի շղթաների պոկվելու պատճառով երեք դեռահաս և մեկ կին տարբեր աստիճանի մարմնական վնասվածքներով տեղափոխվել են հիվանդանոց:
Այս փաստի առնչությամբ Երևանի ոստիկանությունը հետաքննություն է անցկացնում, պատրաստված նյութերի հիման վրա նշանակված են փորձաքննություններ, որոնց արդյունքում կորոշվի քրեական գործի հարուցման հարցը:-0-
