Ինովացիոն համագործակցության ռուս-հայկական կենտրոնը կօգնի Ռուսաստանին և Հայաստանին առաջ տանել փոխշահավետ նախագծերը. Լավրով
ԵՐԵՎԱՆ, 15 ապրիլի. /Նովոստի-Արմենիա/. Ինովացիոն համագործակցության ռուս-հայկական կենտրոնը (ԻՀՌՀԿ) իր ներդրումը կկատարի փոխշահավետ նախագծերի առաջխաղացման հարցում Ռուսաստանի և Հայաստանի ջանքերի համախմբման գործում, նշվում է հինգշաբթի Երևանում ԻՀՌՀԿ-ի բացման արարողության մասնակիցներին ուղղված ՌԴ ԱԳ նախարար Սերգեյ Լավրովի ուղերձում:
«Մենք դիտարկում ենք կենտրոնը որպես հարթակ կառուցողական երկխոսության և գործարար միությունների ներկայացուցիչների, գիտնականների, պրոֆեսորների և երկու երկրների բուհերի դասախոսների միջև կապերի ընդլայնման համար», - ասվում է Լավրովի ուղերձում, որն ընթերցել է Հայաստանում ՌԴ արտակարգ և լիազոր դեսպան Վյաչեսլավ Կովալենկոն:
Լավրովը կարծում է, որ Ռուսաստանի համար զարգացման ինովացիոն ուղուն անցնելը ժամանակի կամքն է, անքակտելի պայմանն է Ռուսաստանի արժանի ապագայի և արագ փոփոխվող աշխարհում մրցունակ առավելությունների ապահովման համար:
«Մենք ելնում ենք նրանից, որ տնտեսության արդիականացման հարցը առանձնահատուկ նշանակություն ունի նաև ԱՊՀ գծով մեր գործընկերների համար», - նշել է նախարարը:
Ուղերձում նաև նշվում է, որ գլոբալ ճգնաժամը համոզիչ կերպով ցույց տվեց, թե «որքան ենք մենք փոխկապակցված միմյանց հետ, որքան համակարգային և երկարաժամկետ բնույթի համատեղ միջոցների կարիք ունենք՝ ճգնաժամի բացասական հետևանքների հաղթահարման համար»:
«Համոզված եմ, որ մեր ժողովուրդների հարուստ, ստեղծագործական ներուժի առավել լիարժեք բացահայտումը կնպաստի մեր պետությունների բարգավաճման ապահովմանը, Հայաստանի և Ռուսաստանի միջև դաշնակցային հարաբերությունների հետագա ամրապնդմանը», - նշվում է Լավրովի ուղերձում:
ԻՀՌՀԿ-ի հիմնական նպատակը երկու երկրների տնտեսական համագործակցության ինտեգրացիոն գործընթացների օժանդակումն է` ինովացիոն բաղադրիչի ամրապնդման և ընդլայման միջոցով:
ՀՀ էկոնոմիկայի նախարարությունը և ՌԴ ԱՊՀ, արտասահմանում բնակվող հայրենակիցների և միջազգային հումանիտար համագործակցության հարցերով Դաշնային գործակալությունը («Ռոսսոտրուդնիչեստվո») համաձայնել են համագործակցություն իրականացնել հետևյալ ուղղություններով` համագործակցել միջպետական ինովացիոն համակարգի ձևավորման ոլորտում, ինչպես նաև ԱՊՀ միջպետական ինովացիոն տարածքի ձևավորման գործում, անցկացնել համատեղ սեմինարներ և խորհրդատվություններ, գիտաժողովներ, փոխանակվել տեղեկատվությամբ, աջակցել ինչպես Ռուսաստանում, այնպես էլ Հայաստանում համատեղ ձեռնարկությունների բացմանը:-0-
