Հայաստանը պետք է վավերացնի հայ-թուրքական արձանագրությունները մինչև վաշինգտոնյան հանդիպումները. փորձագետ
Հայաստանը պետք է վավերացնի հայ-թուրքական արձանագրությունները մինչ ապրիլի 12-13-ին Վաշինգտոնում նախատեսված միջուկային անվտանգության գագաթնաժողովը, երեքշաբթի մամուլի ասուլիսի ժամանակ հայտարարեց Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը:
Վաշինգտոնի գագաթնաժողովին հրավիրված են Թուրքիայի վարչապետ Ռեջեփ Թայիպ Էրդողանն ու ՀՀ նախագահ Սերժ Սարգսյանը, ով նաև պետք է հանդիպի ԱՄՆ նախագահ Բարաք Օբամայի հետ: Բացառված չէ, որ գագաթնաժողովի շրջանակներում կարող է տեղի ունենալ Օբամա-Էրդողան-Սարգսյան եռակողմ հանդիպումը:
«Հայաստանը պետք է մեկնի հանդիպման երկու արձանագրությունները վավերացրած: Դրանով նա ցույց կտա, որ կանխատեսելի գործընկեր է: Վավերացնելով արձանագրությունները՝ մենք չափազանց ծանր դրության մեջ կդնենք Թուրքիային», - ասաց Գրիգորյանը՝ նշելով, որ թուրքական իշխանությունների՝ վերջերս արած բոլոր հայտարարություններն ուղղված են նրան, որ Հայաստանը չվավերացնի արձանագրությունները:
Նրա խոսքերով՝ Հայաստանը, չվավերացնելով արձանագրությունները, ամրապնդում է Թուրքիայի դիրքերը, այն դեպքում, երբ արձանագրությունների վավերացումը Թուրքիային «դեմ առ դեմ» կհանի գերտերությունների հետ:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-
