ԵՐԵՎԱՆ, 17 մարտի. /Նովոստի-Արմենիա/. Մեզ ավելի թույլ դարձնող խնդիրները ծագում են այնտեղ, որտեղ չկա բարեկամություն և փոխգործակցություն, չորեքշաբթի Երևանում ասաց Մոսկվայի և Համայն Ռուսիո Կիրիլ Պատրիարքը Ռուսաստանի պաշտպանության նախարարության 21-րդ դպրոցի աշակերտների հետ հանդիպման ժամանակ։
«Մարդկանց միջև բարի հարաբերությունները մեր ընդհանուր բարգավաճման գրավականն են։ Այնտեղ, որտեղ չկա բարեկամություն և փոխգործակցություն, տարբեր խնդիրներ են ծագում, որոնք մեզ ավելի թույլ են դարձնում»,- ասաց նա։
Կիրիլը կոչ արեց աշակերտներին միշտ սրտում սեր պահել դեպի այն ժողովուրդը, ում հետ նրանք ապրում են։
Պատրիարքը նշեց նաև բարիք գործելու անհրաժետությունը, որքան էլ դա դժվար լինի՝ նշելով, որ հենց բարի գործերն են ձևավորում ժողովրդի կամ ազգի դեմքը։
«Դժվար է բարիք գործել, որովհետև երբ բարիք ես գործում, դու տալիս ես քո մի մասնիկը։ Իսկ տալն ավելի դժվար է, քան ստանալը։ Բայց եթե մարդը սովորում է բարի գործելուն, ապա նա բարի մարդ է դառնում, իսկ բարի մարդը մագնիսի պես իրեն է ձգում այլ մարդկանց»,- ասաց նա։
Պատրիարքը կոչ արեց երեխաներին չվախենալ կյանքի բարդություններից, այլ վախենալ ծուլությունից և անգործությունից։ «Ծուլությունն ու անգործությունը մարդու ամենասարսափելի թշնամիներն են»,- ընդգծեց նա։
Ռուս Ուղղափառ Եկեղեցու առաջնորդն ավելացրեց, որ ամենակարևորն այն է, թե ինչ է մարդն անում իր կյանքում՝ սկսած մանկությունից և մինչև իր վախճանը՝ կառուցում է ինքն իրեն, ձևավորում իր անձը։
Այս կապակցությամբ նա նշեց, որ մարդը պետք է իր վրա աշխատելու հմտություններ ունենա, որոնք սկսում են ձևավորվել, նախևառաջ, կյանքի դպրոցական տարիներին։
«Սեփական անձի վրա աշխատանքը ջանք է պահանջում։ Եթե չկան ջանքեր, չկա նաև աճ։ Մարդն աճում է միայն այն դեպքում, երբ ջանք է գործադրում»,- նշեց նա։
Կիրիլ Պատրիարքը հիշեց, որ իր պատանեկության տարիներին, երբ ինքը սովորում էր դպրոցում և պատրաստվում էր ավարտական քննությունների, իրեն գայթակղել էր պարապմունքների փոխարեն ուրախ ժամանակ անցկացնելը, բայց նա զսպեց իրեն...
«Դա իմ պարտությունը կլիներ, հավանաբար, կազդեր իմ ողջ կյանքի վրա, և ես այնուհետև կյանքում ոչինչ չէի կարողանա անել»,- ասաց նա։
Իր հերթին Ամենայն Հայոց Գարեգին Բ Կաթողիկոսը նշեց, որ դպրոցի այցելությունն ընդգրկվել է այցի ծրագրում Կիրիլ Պատրիարքի հորդորով։ «Սա ևս մեկ անգամ վկայում է այն մասին, թե ինչ մեծ ուշադրություն է դարձնում Պատրիարքը երիտասարդ սերնդի կրթմանը»,- ասաց նա։
Այցի ավարտին Կիրիլ Պատրիարքը գրքեր նվիրեց դպրոցին, իսկ Ամենայն Հայոց Կաթողիկոսը՝ սրբապատկեր։ Իր հերթին դպրոցի աշակերտները երկու Եկեղեցիների առաջնորդներին նվիրեցին իրենց ձեռքով արված նկարներ։
ՌԴ ՊՆ թիվ 21 հանրակրթական դպրոցը բացվել է Երևանում 1994 թվականի սեպտեմբերի 1-ին՝ ՌԴ ԶՈՒ ռազմական կառավարման խմբին առընթեր, Ռուսաստանի պաշտպանության նախարարության կողմից Հայաստանի տարածքում ՌԴ ԶՈՒ զինծառայողների երեխաներին կրթելու համար։ 2006 թվականի նոյեմբերին ատեստավորման արդյունքով դպրոցը ստացել է ՌԴ պետական հավատարմագրում։ -0-
