ԵՐԵՎԱՆ, 12 մարտի. /Նովոստի-Արմենիա/. Հայաստանում հաջորդ շաբաթ փոքր-ինչ կցրտի, իսկ մարտի 20-ից հետո կնկատվի տաք հոսանքների անցում, ուրբաթ ասաց Հայպետհիդրոմետի օպերատիվ հիդրոօթերևութաբանության կենտրոնի պետ Զարուհի Պետրոսյանը «Նովոստի» միջազգային մամուլի կենտրոնում տեղի ունեցած մամուլի ասուլիսի ընթացքում։
Նրա խոսքերով, առաջիկա երեք օրվա ընթացքում Հայաստանում ջերմաստիճանի ներկայիս ֆոնը կպահպանվի, մասնավորապես, հովտային շրջաններում օդի ջերմաստիճանը կկազմի պլյուս 16-17 աստիճան ցերեկը և մինչև 4-7 աստիճան՝ տաքություն գիշերային ժամերին։
Պետրոսյանը նշեց, որ մարտի 13-ի երկրորդ կեսին հանրապետությունում տեղումներ են սպասվում, որոնք մարտի 14-ին չափավոր կլինեն, իսկ 15-16-ին առանձին շրջաններում՝ զգալի։ Մարտի 16-ին լեռնային շրջաններում տեղումները կլինեն ձյան տեսքով, իսկ մեկ օր անց ձյուն կտեղա նաև առանձին նախալեռնային շրջաններում։
«Այս կապակցությամբ մարտի 16-ին սպասվում է ջերմաստիճանի նվազում սառը ճակատի ներթափանցման պատճառով, իսկ արդեն մարտի 18-19-ին անամպ եղանակի պայմաններում սպասվում է ջերմաստիճանի հետագա նվազում»,- ասաց Պետրոսյանը։
Միաժամանակ նա նշեց, որ մարտի 20-ից հետո կնկատվի տաք ճակատների ներթափանցում դեպի Հայաստան և օդի ջերմաստիճանի աստիճանական բարձրացում։
Ինչպես ընդգծեց Հայպետհիդրոմետի օպերատիվ հիդրոօթերևութաբանության կենտրոնի պետը, կանխատեսումներն իրականացվում են հնգօրյա կտրվածքով, և քանի որ նշված ժամկետները դուրս են մնում կանխատեսվող ժամանակահատվածից, ապա նկատի առնելով տարբեր գործոններ՝ ցուցանիշները կարող են արտահայտվել ոչ այն ինտենսիվությամբ, որ ցույց են տալիս ներկայիս կանխատեսումները։
«Այնուամենայնիվ, մենք օդի ջերմաստիճանի նվազում ենք սպասում մարտի 18-ից հետո միջինը 4-6 աստիճանով, սակայն որքան այն կկազմի՝ կհասնի զրոյի թե մինուսային ջերմաստիճանի, հնարավոր կլինի պարզել առաջիկա օրերին, միաժամանակ չեն բացառվում նաև ցրտահարությունները»։
Ըստ նրա, ձյան տեսքով տեղումներ առաջիկա օրերին չեն սպասվում, իսկ հնարավոր ցրտահարությունները չեն բացառվում մինչև ապրիլի վերջ, ինչը վտանգավոր է Արարատյան դաշտի ծաղկող պտղատու ծառերի համար։
Հայաստանում անսովոր տաք ձմեռ էր։ Դեկտեմբերին և առանձին օրերին Երևանում և Արարատյան դաշտավայրում արձանագրվել է պլյուս 15 աստիճան ըստ Ցելսիուսի, իսկ Մեղրիում՝ 20 աստիճան, Կապանում՝ 19 աստիճան։ Նման տաք դեկտեմբերներ արձանագրվել են 1937, 1938, 1963 և 1967 թվականներին։ -0-
