ԱՄՆ Կոնգրեսի կողմից Հայոց ցեղասպանությունը ճանաչող բանաձևի քննարկման հավանականությունը բարձր է. Դաշնակցություն
ԱՄՆ Կոնգրեսում Հայոց ցեղասպանությունը ճանաչող բանաձևի քննարկման ու քվեարկության հավանականությունը բավականին բարձր է, կարծում է Հայ Հեղափոխական Դաշնակցության Գերագույն մարմնի ներկայացուցիչ, ՀՀ ԱԺ արտաքին հարաբերությունների մշտական հանձնաժողովի նախագահ Արմեն Ռուստամյանը:
«Այժմ դժվար է կանխատեսել Կոնգրեսի Ներկայացուցիչների Պալատում բանաձևի քվեարկության ժամկետները: Սական եթե մենք համախմբենք մեր ջանքերը, ապա հավանականությունը մեծ է, որ բանաձևի քվեարկությունը տեղի կունենա», - ուրբաթ «Նովոստի» միջազգային մամուլի կենտրոնում ասաց Ռուստամյանը:
ԱՄՆ Կոնգրեսի արտաքին գործերի հանձնաժողովը մարտի 4-ին ընդունել է Հայոց ցեղասպանության ճանաչման բանաձևը: Բանաձևի ընդունմանը «կողմ» է քվեարկել 23 կոնգրեսական, դեմ՝ 22 կոնգրեսական: Երեսուն կետից բաղկացած փաստաթուղթը (թիվ 252 բանաձև) կոչ է անում ԱՄՆ նախագահին՝ ջանքեր գործադրել մարդու իրավունքներին և ազատություններին, էթնիկ զտումների և Հայոց ցեղասպանությանը վերաբերող հարցերին արժանի լուծում տալու համար:
Ռուստամյանի խոսքերով՝ ԱՄՆ Կոնգրեսում չեն կանոնակարգվում հանձնաժողովներում արդեն հավանության արժանացած բանաձևերի քվեարկության կոնկրետ ժամկետները: Սակայն, ինչպես կարծում է հայ խորհրդարանականը, 2010 թ.-ի ապրիլի 24-ին նշվող Հայոց ցեղասպանության 95-ամյա տարելիցը խթան կհանդիսանա բանաձևի ճանաչմանն ուղղված ջանքերի ակտիվացման համար:
Հանձնաժողովի նախագահն ավելացրեց, որ ԱՄՆ Կոնգրեսի հանձնաժողովում բանաձևի քվեարկության արդյունքներն իր համար սպասելի էին, քանի որ բանաձևի կողմնակիցների և հակառակորդների թիվը հայտնի էր քվեարկությունից մի քանի ամիս առաջ: Սակայն Ռուստամյանի խոսքերով՝ ձայների հետագա վերադասավորման վրա մեծ ազդեցություն ունեցավ Վաշինգտոն ժամանած թուրք պատվիրակների քաղաքականությունը, ովքեր համոզեցին մի շարք կոնգրեսականներին այն բանում, որ բանաձևի ընդունումը բացասաբար կանդրադառնա հայ-թուրքական հարաբերությունների կարգավորման գործընթացի և երկկողմ արձանագրությունների վավերացման վրա:
Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
«Թուրքերի շանտաժը բավականին ուժեղ ազդեց ձայների դասավորվածության վրա, այդ պատճառով մենք պետք է պատրաստվենք Կոնգրեսում կայանալիք քննարկմանը և ուսումնասիրենք նրանց դիրքորոշումը», - ասաց պատգամավորը:
Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը:--0—
