Եվրամիությունը կաջակցի ղարաբաղյան հակամարտության կարգավորմանն ուղղված ԵԱՀԿ ՄԽ ջանքերին, ասաց Իսպանիայի արտաքին գործերի և համագործակցության հարցերի նախարար Միգել Անխել Մորատինոսը (Miguel Angel Moratinos):
«ԵՄ-ն ինչպես միշտ կաջակցի հակամարտության կարգավորմանն ուղղված ԵԱՀԿ ՄԽ բոլոր ջանքերին», - ասաց Մորատինոսը երեքշաբթի իր հայ գործընկեր Էդվարդ Նալբանդյանի հետ համատեղ մամուլի ասուլիսի ժամանակ:
Իսպանիայի արտաքին գործերի և համագործակցության հարցերի նախարար Միգել Անխել Մորատինոսը (Miguel Angel Moratinos) երեքշաբթի ժամանել է Հայաստան՝ որպես Եվրամիության պատվիրակության ղեկավար: Այցի ընթացքում նախատեսված է պատվիրակության հանդիպումը Հայաստանի նախագահ Սերժ Սարգսյանի և արտգործնախարար Էդվարդ Նալբանդյանի հետ:
Մորատինոսը հիշեցրեց, որ առաջին անգալ այցելել է տարածաշրջան և ծանոթացել է իրավիճակի հետ 2007թ.-ին՝ ԵԱՀԿ գործող նախագահի պաշտոնում: Միաժամանակ նա հիշեցրեց, որ ԵԱՀԿ-ում Իսպանիայի նախագահության ընթացքում ամրագրվեցին այսպես կոչված ղարաբաղյան հակամարտության կարգավորման մադրիդյան սկզբունքները, որոնք նախատեսում են հակամարտության խաղաղ կարգավորումը՝ միջազգային իրավունքի նորմերի հիման վրա: Իսպանիայի ԱԳ նախարարն ավելացրեց, որ ԵՄ-ն աջակցում է ԵԱՀԿ ՄԽ-ի այդ առաջարկներին:
ԵԱՀՄ ՄԽ համանախագահները 2007 թ.-ի նոյեմբերին Հայաստանի և Ադրբեջանի նախագահների քննարկմանը ներկայացրեցին ղարաբաղյան հակամարտության խաղաղ կարգավորման հիմնարար սկզբունքները: Մադրիդյան սկզբունքները, մասնավորապես, նախատեսում են ազատ կամաարտահայտության միջոցով Ղարաբաղի կարգավիճակի սահմանումը, Լեռնային Ղարաբաղի և Հայաստանի միջև ցամաքային կապի ապահովումը, անվտանգության երաշխիքների տրամադրումը:
«Համանախագահները փորձում են գրավել բանակցության կողմերին հակամարտության խաղաղ և քաղաքական լուծման գործընթացի մեջ: Այս հարցը ես կքննարկեմ Ադրբեջան կատարած այցի ժամանակ՝ խնդրի կարգավորման համար դրական մթնոլորտ ստեղծելու համար: ԵՄ-ն կաջակցի բոլոր ջանքերին՝ ղարաբաղյան հակամարտության կարգավորման համար», - հավաստիացրեց Մորատինոսը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
