ԵՐԵՎԱՆ, 18 փետրվարի. /Նովոստի-Արմենիա/. Լեռնային Ղարաբաղի հակամարտության գոտում ռազմական գործողությունների վերսկսում չի լինի, կարծում է քաղաքագետ, Կովկասի ինստիտուտի տնօրեն Ալեքսանդր Իսկանդարյանը:
«Պատերազմ չի լինի: Ես Նոստրադամուսը չեմ, և չգիտեմ, թե ինչ կլինի 30 տարի հետո, բայց ներկայիս իրավիճակում հակամարտության վերսկսման հավանականություն չկա»,- հինգշաբթի մամուլի ասուլիսի ժամանակ ասաց քաղաքագետը:
Նա նշեց, որ Ադրբեջանի ներկայիս քաղաքական վերնախավն այնքան էլ ոչ ադեկվատ չէ, որպեսզի հակամարտության վերսկսման գնա՝ հավելելով, որ այդ քայլի համար պետք է 60-80 տոկոսի հաջողության վստահություն ունենալ, այլ ոչ թե 2 տոկոսի:
«Ադրբեջանը հազիվ թե ինքնասպան գործողությունների գնա»,- նշեց Իսկանդարյանը:
Ըստ նրա՝ Ադրբեջանի համար բարեհաջող կլինի միայն բլիցկրիգի տարբերակը՝ առավելագույնը մեկ շաբաթ տևող պատերազմի: Հակառակ ցանկացած դեպքում, ինչպես կարծում է քաղաքագետը, պատերազմի վերսկսումը Ադրբեջանին ձեռնտու չէ, այդ իսկ պատճառով էլ քիչ հավանական է:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
-0-
