Հայկական ԱԷԿ-ը գտնվում է համեմատաբար անվտանգ սեյսմիկ գոտում. Սեյսմիկ ծառայության ղեկավար

Հայկական ԱԷԿ-ը գտնվում է համեմատաբար անվտանգ սեյսմիկ գոտում, հինգշաբթի մամուլի ասուլիսի ժամանակ ասաց ՀՀ Սեյսմիկ պաշտպանության ազգային ծառայության ղեկավար Ալվարո Անտոնյանը:

«Տարածքը, որի վրա գտնվում է ԱԷԿ-ը, առավել անվտանգ է սեյսմիկ տեսակետից»,- ասաց Անտոնյանը:

Ըստ նրա՝ երկու-երեք տարին մեկ սեյսմիկ անվտանգության կայանները ստուգում են ոչ միայն հայ մասնագետները, այլև միջազգային կազմակերպությունների փորձագետները, այդ թվում՝ ՄԱԳԱՏԵ-ի:

Անտոնյանը հայտնեց նաև, որ ավարտված են տարածքի գնահատման աշխատանքները, որտեղ ծրագրվում է էլեկտրակայանի նոր բլոկի շինարարությունը:

«Աշխատանքներն արդեն ավարտված են, և շինարարությունը կտարվի մեր հաշվարկների համաձայն»,- հայտարարեց նա:

Հայաստանը նախատեսում է ԱԷԿ նոր բլոկ կառուցել՝ մոտավորապես 1000 ՄՎտ հզորությամբ, և այս նախագիծը կարժենա մոտ 2 մլրդ դոլար։ Այս նախագծի իրականացման համար արտասահմանյան կապիտալ ներգրավելու նպատակով 2006թ. ՀՀ խորհրդարանն օրենսդրությամբ անվավեր ճանաչեց նոր ատոմային բլոկների պետական մենաշնորհի իրավունքը։ Շինարարական աշխատանքները ծրագրվում է սկսել 2011թ.-ի սկզբից։

Մեծամոր քաղաքում գործող հայկական ԱԷԿ-ը շահագործման է հանձնվել 1976-ին։ Ներկայում գործում է կայանի միայն երկրորդ բլոկը՝ 407,5 ՄՎտ հզորությամբ:--0--