Հայաստանի երիտասարդ մասնագետները պրակտիկա կանցնեն Եվրամիության խորհրդատվական խմբում

Հայաստանի Ազգային անվտանգության խորհրդի քարտուղար Արթուր Բաղդասարյանը, Հայաստանում Եվրոպական հանձնաժողովի պատվիրակության ղեկավար, դեսպան Ռաուլ դը Լուցենբերգերը և Հայաստանում ՄԱԿ-ի մշտական համակարգող, UNDP մշտական ներկայացուցիչ Դաֆինա Գերչևան երեքշաբթի Հուշագիր ստորագրեցին Հայաստանի երիտասարդ մասնագետներին ԵՄ Խորհրդատվական խմբում պրակտիկա անցնելու նպատակով ընդունելու վերաբերյալ։

«Հայաստանի և Եվրոպական միության միջև քաղաքական համագործակցությունն արդյունավետորեն է զարգանում։ 2009-2011 թվականների գործողությունների ծրագրի համաձայն, մշակվել է բարեփոխումների ծրագիր շուրջ 190 ուղղություններով։ Այսօր բարեփոխումները բոլոր ուղղություններով հաջողությամբ իրագործվում են»,- ասաց Բաղդասարյանը։

Նրա խոսքերով, հուշագրի ստորագրումը թույլ կտա հայկական բուհերի առավել աչքի ընկած շրջանավարտներին ընդգրկվել Հայաստանի և ԵՄ միջև համագործակցության խորացմանն ուղղված խորհրդատվական խմբի աշխատանքներում։

«Հետագայում դա հնարավորություն կտա մեր երիտասարդ մասնագետներին աշխատելու եվրոպական կառույցներում և ուղղակիորեն մասնակցելու նշված բարեփոխումների իրականացմանը»,- նշեց Բաղդասարյանը։

Հայաստանի Անվտանգության խորհրդի քարտուղարն ավելացրեց, որ այդ բարեփոխումներն ուղղված են Հայաստանում եվրոպական չափորոշիչների ներդրմանը և մերձեցմանը Հայաստանի ու Եվրամիության միջև։

Լուցենբերգերն իր հերթին ողջունեց տվյալ նախաձեռնությունը՝ նշելով, որ սա մի նոր գործիք է, որը թույլ կտա առանձնացած հայ շրջանավարտներին եվրոպական կառույցներում և եվրոպացի փորձագետների հետ աշխատանքային արժեքավոր փորձ ունենալ։   

Ըստ նրա, ծրագիրը շարունակական կլինի և Հայաստանի ու ԵՄ միջև փորձի փոխանակման նոր մեխանիզմ կդառնա։

ԵՄ խորհրդատուների՝ Հայաստան ուղղելու վերաբերյալ պայմանավորվածությունը ձեռք է բերվել 2008 թվականի նոյեմբերին ՀՀ նախագահ Սերժ Սարգսյանի՝ Բրյուսել կատարած այցի ընթացքում։

Խմբի նպատակն է խորհրդատվական աջակցության տրամադրումը Հայաստանի պետական մարմիններին և գերատեսչություններին «Եվրոպական հարևանության» քաղաքականության գործողությունների ծրագրի արդյունավետ իրականացման համար՝ քաղաքական և տնտեսական բարեփոխումների համատեքստում։ -0-