«Ժառանգություն» կուսակցությունը պայքարելու է ԵԽԽՎ-ում հայկական խորհրդարանական պատվիրակության մշտական տեղից իրեն զրկելու դեմ

ԵՐԵՎԱՆ, 21 հունվարի. /Նովոստի-Արմենիա/. «Ժառանգություն» կուսակցությունը պայքարելու է ԵԽԽՎ-ում հայկական խորհրդարանական պատվիրակության մշտական տեղից իրեն զրկելու դեմ, հինգշաբթի լրագրողներին հայտնեց «Ժառանգություն» ընդդիմադիր կուսակցության նախագահ Արմեն Մարտիրոսյանը:  

«Մենք համապատասխան գրություններ կուղարկենք մեր միջազգային գործընկերներին, ինչպես նաև կփորձենք իրավաբանորեն լուծել այդ հարցը Հայաստանում»,- հայտարարեց նա:  

Մարտիրոսյանի կարծիքով՝ «Ժառանգությանը» ԵԽԽՎ-ում հայկական պատվիրակության իր մշտական տեղից զրկելու գործընթացը վկայում է այն մասին, որ իշխանությունները ոչ միայն քաղաքական երկխոսության ու ժողովրդավարության հաստատման կողմնակիսներ չեն, այլ ընդհակառակը՝ ավելի են խորացնում իրավիճակը:  

Նա հավելեց, որ ԵԽԽՎ դրույթների համաձայն՝ երկրների պատվիրակություններում պետք է ներկայացված լինեն բոլոր գործող քաղաքական կարծիքները, իսկ հայկական խորհրդարանում, ըստ նրա, երեք քաղաքական կարծիք կա՝ կոալիցիոն կուսակցությունների, ՀՅԴ և «Ժառանգության»:

Մարտիրոսյանը նշեց նաև, որ ԵԽԽՎ հայկական պատվիրակությունում  «Ժառանգության» ներկայացուցիչ Զարուհի Փոստանջյանը շատ ակտիվ է աշխատել այդ կառույցում, ինչի մասին է վկայում նրա ընտրվելը «Ժողովրդական կուսակցությունների խմբի» բյուրո և Մոնիտորինգային հանձնաժողով: -0-