ՀՀ վարչապետը ԵՄ խորհրդականների քննարկել է ազատ առևտրի մասին պայմանագրի ստորագրման աշխատանքները

Երեքշաբթի վարչապետ Տիգրան Սարգսյանը Հայաստանում Ռաուլ դը Լուցենբերգերի գլխավորած ԵՄ խորհրդատվական խմբի հետ քննարկել է Ազատ առևտրի համաձայնագրի կնքման ուղղությամբ իրականացվող աշխատանքները, ապրանքների ազատ տեղաշարժի,  GSP+ համակարգի ներդրման հետ կապված խնդիրների լուծմանն ուղղված քայլերը, հայտնում է հանրապետության կառավարության մամուլի ծառայությունը:

Կողմերն անդրադարձել են Հայաստանի կառավարության կողմից իրականացվող հակակոռուպցիոն քաղաքականությանը, հարկային ու մաքսային ոլորտներում իրականացվող բարեփոխումներին, մասնավորապես, թափանցիկ կառավարման համակարգի զարգացմանը:

Զրուցակիցներն անդրադարձել են  մտավոր սեփականության պաշտպանությանը, ինչպես նաև փոքր ու միջին ձեռնարկությունների զարգացման հնարավորություններին:

Ընդգծվել է պետական պարտքի կառավարման ոլորտում ընթացող աշխատանքների կարևորությունը, ֆինանսների նախարարության համապատասխան կառույցների կարողությունների ամրապնդումը, այդ համատեքստում կարևորվել են պետական կառավարման ոլորտում մասնագետերի պատրաստման եւ վերապատրաստման խնդիրները:

Վարչապետը կարևորել է ԵՄ խորհրդատվական խմբի ավանդույթ դարձած հանդիպումները, որոնք հնարավորություն են տալիս ամփոփել կատարված աշխատանքն ու մատնանշել հետագա գործողությունները:

Վարչապետը շնորհակալություն է հայտնել խմբի անդամներին մասնագիտական կարևոր խորհրդատվության համար: Նա նշել է, որ որոշ խնդիրների լուծման համար առանձին հանդիպումներ են նախատեսված, որպեսզի ավելի հստակ հանձնարարականներ տրվեն:

11 փորձագետներից կազմված ԵՄ խորհրդատվական խումբը Հայաստանում աշխատում է ընթացիկ տարվա ապրիլի մեկից և խորհրդատվություն է տրամադրում Եվրոպական հարևանության քաղաքականության գործողությունների ծրագրի իրականացման հարցերի, ինչպես նաև ժողովրդավարական ու տնտեսական կառույցների ամրացման շուրջ: Հայաստանն առաջին երկիրն է, որի հանդեպ կիրառվում են տվյալ նորարարական մոտեցումները տեխնիկական աջակցության նպատակով: -0-