ԵՐԵՎԱՆ, 21 դեկտեմբերի. /Նովոստի-Արմենիա/. Արտգործնախարարի տիկնոջ՝ Նատալիա Նալբանդյանի ղեկավարած «Բարի գալուստ Հայաստան» ասոցիացիայի կազմակերպած ամանորյա բարեգործական տոնավաճառն է շաբաթ օրը անցկացվել է Երևանի քաղաքապետարանի շենքում:
Ինչպես հաղորդում է ՀՀ ԱԳՆ մամուլի ծառայությունը, տոնավաճառին առանձին տաղավարներով մասնակցեցին շուրջ 40 կազմակերպություն, այդ թվում՝ Երևանում հավատարմագրված 17 դիվանագիտական ներկայացուցչություններ:
Դիվանագետները ներկայացրել էին իրենց երկրներից հուշանվերներ, ազգային ուտեստներ, իսկ հայկական ընկերությունները ներկայացրել էին իրենց արտադրանքը:
Տոնավաճառից ստացված ողջ հասույթը, Երևանի քաղաքապետարանի առաջարկած ծրագրի համաձայն, տրամադրվելու է Շենգավիթ համայնքի մի քանի մանկապարտեզների կարիքներին:
«Ամանորին ընդունված է նվերներ անել ամենամոտ ու ամենասիրելի մարդկանց և, իհարկե, ամենափոքրիկներին՝ մանուկներին: Ցանկանում եմ սրտանց շնորհակալություն հայտնել բոլոր մասնակիցներին ու ներկաներին՝ բարեսրտության, առատաձեռնության և մանուկներին օգնության հասնելու պատրաստակամության համար», - ասել է ՀՀ արտգործնախարարի տիկինը՝ շնորհակալություն հայտնելով Երևանի քաղաքապետին քաղաքապետարանի շենքում միջոցառումը անցկացնելու հնարավորություն ընձեռելու համար:
Միջոցառմանը մասնակցել է Հայաստանի առաջին տիկին Ռիտա Սարգսյանը, ինչպես նաև Հայաստանի վարչապետի տիկին Գոհար Սարգսյանը, նախկին վարչապետ Անդրանիկ Մարգարյանի տիկին Սուսաննա Մարգարյանը, Երևանի քաղաքապետի տիկին Նունե Բեգլարյանը, պաշտպանության նախարարի տիկին Ռուզաննա Օհանյանը, Ազգային անվտանգության խորհրդի քարտուղարի տիկին Աննա Բաղդասարյանը:
Տոնավաճառի բացմանը ներկա էին ԱԳ նախարար Էդվարդ Նալբանդյանը, Երևանի քաղաքապետ Գագիկ Բեգլարյանը, Սփյուռքի նախարար Հրանուշ Հակոբյանը:
Տոնավաճառին տեղի ունեցավ նաև «Ատեքս» նորաձևության կենտրոնի զգեստների ցուցադրումը:-0-
