Բրիտանիայի թագուհու խորհրդականը մեղադրել է Մեծ Բրիտանիայի կառավարությունը Հայոց ցեղասպանությունը մերժելու մեջ
Բրիտանացի հայտնի իրավաբան, մարդկության դեմ հանցագործությունների հարցերի մասնագետ, «Թագուհու խորհրդական» տիտղոսակիր Ջեֆրի Ռոբերթսոնը մեղադրեց Մեծ Բրիտանիայի կառավարությունը Հայոց ցեղասպանության մերժման համար բավարար հիմքերի բացակայության և բրիտանական հասարակությունը մոլորեցնելու համար։
Ինչպես տեղեկացնում է Հայաստանի ԱԳՆ մամուլի ծառայությունը, այդ մասին Ռոբերթսոնը հայտարարեց երկուշաբթի Մեծ Բրիտանիայի Լորդերի պալատում «Արդյո՞ք եղել է Հայոց ցեղասպանությունը» իր զեկույցի ընթացքում։
Ռոբերթսոնը հայտարարեց, որ Մեծ Բրիտանիայի կառավարությունը երբեք չի ունեցել և այժմ էլ որևէ իրավական հիմք չունի քսաներորդ դարի առաջին ցեղասպանության մերժման համար։ Փորձագետի կարծիքով՝ նման մերժումը պայմանավորված է բացառապես քաղաքական, տնտեսական և ռազմական պատճառներով։
Ռոբերթսոնի խոսքերով՝ ինքը համաձայնել է Հայոց ցեղասպանության հարցով զեկույց ներկայացնել միայն այն պայմանով, որ լիակատար անկախություն կունենա զեկույցում տեղ գտած փաստերի և իր սեփական եզրակացությունների մատնանշման և ներկայացման հարցում։ Զեկույցը հիմնված է Մեծ Բրիտանիայի (հիմնականում, Արտաքին գործերի նախարարության) կառավարության արխիվների ուսումնասիրման վրա։ Ռոբերթսոնը նշել է, որ ինքն անկողմնակալ է եղել և ուսումնասիրել է բացառապես Հայոց ցեղասպանության իրավաբանական ասպեկտը։
Իրավաբանի կարծիքով՝ եթե 1915-1916 թվականներին Օսմանյան կայսրությունում տեղի ունեցած իրադարձությունները տեղի ունենաին այսօր, ամբողջ քաղաքակիրթ աշխարհը դրանք կորակեր որպես ցեղասպանություն, քանի որ դրանք լիովին համընկնում են ՄԱԿ-ի՝ «Ցեղասպանության կանխման մասին» կոնվենցիայի այս երևույթի նկարագրությանը։
Ռոբերթսոնը դատապարտեց նաև անգլիական խորհրդարանը, որը տասնամյակների ընթացքում չի ճանաչում Հայոց ցեղասպանության փաստը՝ հիմնվելով Արտաքին գործերի նախարարության անհիմն կարծիքի վրա։
Հանդիպումը կազմակերպել է Բրիտանահայկական համակուսակցական խորհրդարանական խումբը, Իրավական նախաձեռնության հայկական խումբը, Ուելսի միջազգային հարաբերությունների կենտրոնը և «Նոր Սերունդ» հրատարակչությունը։
Հանդիպմանը մասնակցեցին բրիտանական խորհրդարանի և Ֆորին Օֆիսի, մի շարք միջազգային և հասարակական կազմակերպությունների, հայկական համայնքի, ինչպես նաև Լոնդոնի Հոլոքոսթի հիշատակի խորհրդի ներկայացուցիչները։
Հանդիպումը բացեց Միացյալ Թագավորությունում ՀՀ դեսպան Վահե Գաբրիելյանը։ Նա մեծապես կարևորեց Ջեֆրի Ռոբերթսոնի նման հեղինակավոր իրավաբանի կողմից Հայոց Ցեղասպանությանն անդրադառնալու հանգամանքը։
Գաբրիելյանն անհասկանալի համարեց Հայոց ցեղասպանության չճանաչումը Մեծ Բրիտանիայի նման երկրում՝ հույս հայտնելով, որ զեկույցը կարևոր դեր կխաղա այդ իրավիճակը շտկելու գործում։
Դեսպանը նշեց նաև Հայաստանի կառավարության անփոփոխ դիրքորոշումը Հայոց ցեղասպանության միջազգային ճանաչման և դատապարտման հարցում։
Հայոց մեծ եղեռնը 20-րդ դարի առաջին ցեղասպանությունն է, որը կազմակերպվել և ծրագրավորված իրագործվել է երիտթուրքական կառավարության կողմից, ինչի հետևանքով Օսմանյան կայսրության կազմի մեջ մտնող Արևմտյան Հայաստանում, սրի է քաշվել ավելի քան 1,5 մլն հայ։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը։ -0-
