Հայաստանի սպորտի և երիտասարդության հարցերի նախարար Արմեն Գրիգորյանը շնորհավորել է հայ ուսանողությանը՝ Ուսանողի միջազգային օրվա կապակցությամբ:
Ինչպես «Նովոստի-Արմենիա» գործակալությանը հայտնեցին նախարարության մամուլի ծառայությունից, ուղերձում նշվում է, որ հայ ուսանողությունը շոշափելի զարգացում է ապրել անցած տարիների ընթացքում, և չկա որևէ ոլորտ՝ մշակույթ, կրթություն, գիտություն, սպորտ, ձեռներեցություն, կառավարում և այլն, որտեղ առկա խնդիրներն ու հիմնահարցերն այս կամ այն կերպ չառնչվեն երիտասարդության հետ կամ չհուզեն նրան:
Նախարարը նշեց, որ 90-ականների սկզբին բուհերում սկսված ուսանողական շարժումները հանգեցրին ուսանողական ինքնակառավարման մարմինների ստեղծմանը, որոնք այսօր արդեն գրեթե բոլոր բուհերում հանդես են գալիս որպես ինքնուրույն և կազմակերպված կառույցներ` իրենց մասնակցությունը բերելով բուհերի կառավարման, կազմակերպչական և գիտակրթական գործընթացներին:
«Հանդիսանալով բազմադարյա մեր պատմության ընթացքում նախնիների կողմից ստեղծված, սերնդեսերունդ փոխանցված մնայուն արժեքների կրողը, հասարակության զարգացման շարժիչ ուժը` այսօր ձեզ է վերապահված ազատ, հզոր և ժողովրդավարական պետության կառուցման ու կայուն զարգացման ապագան».- ասվում է ուղերձում:
«Երիտասարդական ավյունն ու նորի ձգտումը ձեր մեջ դաստիարակել են ազնիվ ու հաստատակամ քաղաքացու բնավորություն»,- նշել է նախարարը:
Նա մաղթել է ուսանողներին, որպեսզի նրանց կյանքում ապագա գործունեությունը հիմնված լինի բարձր արժեքների, ազնիվ նպատակների և վեհ գաղափարների վրա:
Նա նաև մաղթել է ուսանողներին առողջություն, երջանկություն և կրթական ու գիտական նորանոր բարձունքների հաղթահարում, հաջողություններ ու համարձակ ձեռնարկումներ՝ ի նպաստ հասարակության և ի շահ պետության:--0--
