Հայ գործարարը հերքել է իր տանը կենդանիների հետ դաժան վերաբերմունքի մասին լուրերը

ԵՐԵՎԱՆ, 26 հոկտեմբերի. /Նովոստի-Արմենիա/. Խոշոր հայ ձեռներեց, «Բարգավաճ Հայաստան» կոալիցիոն կուսակցության նախագահ Գագիկ Ծառուկյանը հերքել է իր տանը կենդանիների հետ դաժան վերաբերմունքի մասին լուրերը:

Անցյալ շաբաթ ինտերնետում տարածվել էր տեսահոլովակ, որում կենդանիների պայքար է տեսագրված: Տեսագրության մեջ երևում է երկու առյուծներով վանդակ, ուր ավանակ են ներս թողնում: Կենդանիների պայքարը խրախուսվում է հոլովակը նկարահանող օպերատորների ճիչերով: Ի զարմանս բոլորի՝ ավանակին հաջողվում է ազատվել առյուծներից, սակայն արդյունքում կենդանու վրա մի քանի անգամ կրակում են և սպանում:   

Դաժան հոլովակի տարածումն ինտերնետում օգտվողների բուռն դժգոհությունն է առաջացրել, որոնք միաձայն հոլովակը կապել են հայ խոշոր գործարարներից մեկի՝ Գագիկ Ծառուկյանի անվան հետ, որը հայտնի է առյուծների հանդեպ ունեցած իր առանձնահատուկ սիրով, որոնց նա պահում է իր տան գազանանոցում:

Ընդ որում ինքը՝ Ծառուկյանը երկուշաբթի լրագրողների հետ զրույցում հերքել է լուրերն այն մասին, որ նման «զվարճանքները» տեղի են ունեցել իր տանը:  

«Ես պատրաստ եմ հենց հիմա բոլոր լրագրողներին իմ տուն հրավիրել ու ցույց տալ այնտեղ գտնվող գազանանոցն ու կենդանիներին պահելու պայմանները: Ես ոչ այդպիսի կենդանիներ ունեմ, ոչ այդպիսի վանդակներ, ինչպիսին ներկայացված են տեսահոլովակում, իսկ իմ տան տարածքում նման բան ընդհանրապես անթույլատրելի է»,- ասել է Ծառուկյանը:

Ընդ որում ձեռներեցի մամուլի քարտուղարը միանգամից լրագրողներին ներկայացրեց տնային գազանանոցում պահվող կենդանիների լուսանկարները, այդ թվում՝ սպիտակ առյուծի և սպիտակ վագրի:  

Ծառուկյանն ընդգծեց, որ սիրում է կենդանիներ, հատկապես առյուծներ, հոգ է տանում նրանց մասին, իսկ լույս աշխարհ եկած ձագուկներին տալիս է Երևանի գազանանոցին: «Կենդանիների համար լավ խնամք է ապահովված, նրանց ամենօրյա սննդակարգում 10 կգ թարմ միս է ընդգրկված»,- ասաց նա:  

Գործարարը նշեց, որ սովոր է պատասխանատվություն կրել իր արարքների համար, բայց նա, ով մտածել է այդ կեղծիքն ու տարածել այն ինտերնետում, նույնպես պետք է պատասխան տա, ընդ որում՝ բարոյապես, ֆիզիկապես և ֆինանսապես:

Լրագրողների այն հարցին, թե իր համար ո՞րն է ֆիզիկական պատիժը, Ծառուկյանը պատասխանեց. «Ականջները կքաշեմ, և դա արդար կլինի»: -0-