Հայկական դասական կամերային երաժշտության հատընտիրի ձայնագրումը հետաձգվում է անբավարար ֆինանսավորման պատճառով

Խաչատրյանի անվան տրիոյի կողմից «Հայկական դասական կամերային երաժշտության հատընտիրի» ձայնագրումը հետաձգվում է անբավարար ֆինանսավորման պատճառով, չորեքշաբթի «Նովոստի» միջազգային մամուլի կենտրոնում ասաց տրիոյի մասնակից, ջութակահար Կարեն Շահգալդյանը:

Խաչատրյանի անվան տրիոն ծրագրում էր ստեղծել «Հայկական դասական կամերային երաժշտության անթոլոգիան»: Հատընտիրի մեջ կներառվեն հայ կոմպոզիտորների կողմից գրված ստեղծագործությունները, որոնք չունեն ձայնային տարբերակ:

Շահգալդյանը նշեց, որ Հատընտիրի ձայնագրումը լուրջ ֆինանսական ծախսեր է պահանջում:

Նրա խոսքերով, այսօրվա դրությամբ շատ ստեղծագործություններ ձայնագրված չեն, ինչի կապակցությամբ անհնար է դրանք լսել:

«Ցավոք, մենք դեռ չենք սկսել Հատընտիրի ձայնագրումը անբավարար ֆինանսական միջոցների պատճաով, սակայն կատարում ենք այդ ստեղծագործությունները, ներառում ենք դրանք համերգացանկի մեջ, և ես հուսով եմ, որ մենք կվերադառնանք այդ գաղափարին, քանի որ դա շատ անհրաժեշտ է », - ասաց Շահգալդյանը:

Միաժամանակ նա հիշեցրեց Ռուսաստանի փորձը, երբ հայտնի դիրիժոր և կոմպոզիտոր Եվգենի Սվետլանովը պետական նվագախմբի հետ ձայնագրեց ռուսական ողջ սիմֆոնիկ երաժշտությունը, ինչի շնորհիվ այն պահպանվեց հետնորդների համար:

«Հուսով եմ, որ ժամանակին դա կհաջողվի նաև մեզ, իսկ այժմ մենք շատ գաղափարներ ունենք և կարծում եմ, որ մենք կշարունակենք առանձին երաժշտական ստեղծագործությունների ձայնագրումը», - ասաց Շահգալդյանը:

Խաչատրյանի անվան տրիոն ստեղծվել է 1999 թ.-ին  որպես «Arsika» տրիո: Համույթը ելույթ է ունեցել Շվեյցարիայում, Կենտրոնական և Հարավային Ամերիկայում, Ռուսաստանում, Հայաստանում: Մասնակցել է այնպիսի փառատոներում, ինչպիսիք են Լոզանում անցկացվող «Schubertiade»-ն, Կոստա Ռիկայում անցկացվող «Festival de las Artes»-ը, Մեքսիկայում անցկացվող «Festival International Cervantino»-ն:

Տրիոյի ելույթները բազմաթիվ անգամ հեռարձակվել են հեռուստատեսությամբ: Երաժշտագետներն ընդգծում են համույթի վիրտուոզ կատարումը, իրական երաժշտականություն ու ոճային զգացողությունը:

2006թ.-ից ի վեր համույթը հանդես է գալիս հետևյալ կազմով՝ Արմինե Գրիգորյան (դաշնամուր), Կարեն Շահգալդյան (ջութակ), Կարեն Քոչարյան (թավջութակ): Վերջին չորս տարվա ընթացքում համույթը Հայաստանում իրականացնում է լուսավորչական գործունեություն՝ համերգներ տալով ոչ միայն մայրաքաղաքում, այլև մարզերում, անցկացնում է վարպետության դասեր դպրոցականների և ուսանողների համար:-0-