Հոկտեմբերի 2-4-ը Երևանում տեղի կունենա հինգերորդ ամենամյա միջազգային տեխնոլոգիական DigiTec Expo 2009 ցուցահանդեսը, երկուշաբթի «Նովոստի» միջազգային մամուլի կենտրոնում լրագրողներին հայտնեց Տեղեկատվական տեխնոլոգիաների ընկերությունների միության գործադիր տնօրեն (UITE) Կարեն Վարդանյանը:
«Մեր հիմնական խնդիրը տարածաշրջանային ցուցահանդեսի ձևավորումն է, որը կներկայացնի բարձր տեխնոլոգիաների ոլորտում վերջին նվաճումներն ու տեխնոլոգիական նորույթները»,- ասաց Վարդանյանը:
Նրա խոսքերով՝ ցուցահանդեսի նպատակը տեղեկատավական ու հեռահաղորդակցական ոլորտներում գործնական մթնոլորտի ստեղծումն է:
Ցուցահանդեսին կմասնակցեն տեղեկատվական և բարձր տեխնոլոգիաների ոլորտի շուրջ 50 ընկերություններ, սպասվում է նաև, որ այն կունենան շուրջ 11-12 հազար այցելու:
«Այս տարի հատուկ ակտիվություն են ցուցաբարել նորաստեղծ ընկերությունները, ինչի առնչությամբ ծրագրվում է Startup ֆորում անցկացնել: Սպասվում է, որ դրան կմասնակցեն ավելի քան մեկ տասնյակ ընկերություններ, և ինչը հետագայում ցուցահանդեսի շրջանակներում կարող է վերածվել փոքր վենչուրային Ֆորումի»,- ասաց Վարդանյանը:
DigiTec 2009 ցուցահանդեսին և DigiTec Startup ֆորումին զուգահեռ կանցկացվեն նաև էլեկտրոնային կառավարման e-government ֆորումը, տեխնոլոգիական նորույթների ավանդական սեմինարներ, խաղարկություններ, ինչպես նաև երկու «Line Tracking»-ի եզրափակիչը և Հայաստանում ռոբոտների (Armrobotics) բաց առաջնության նախատեսված 4 մրցույթների «համակարգչային սիմուլյացիան»:
Ցուցահանդեսի շրջանակներում կներկայացվեն նաև հարկերի էլեկտրոնային հայտարարագրման ծրագրի ներմուծման արդյունքները:
Ցուցահանդեսին կներկայացվի բջջային ծառայությունների առանձին անկյուն, որտեղ համապատասխան ընկերությունները կներկայացնեն իրենց լուծումները հայկական շուկայում:
Միջոցառման գլխավոր հովանավոր Ucom ընկերությունը կներկայացնի որակյալ ու մատչելի IP հեռուստատեսության ու IP հեռախոսակապի տրամադրման հնարավորությունները, իսկ ցուցահանդեսի պաշտոնական հովանավոր ADC ընկերությունը նոր ծառայությունները կներկայացնի:
Այս տարի DigiTec-ի շրջանակներում կգործի նաև GameZone, որտեղ երիտասարդության ներկայացուցիչները կկարողանան ծանոթանալ խաղային վերջին լուծումներին, փորձարկել դրանք, մրցել միմյանց հետ:
Կանցկացվեն նաև Armrobotics մրցույթի եզրափակիչ փուլերը՝ «Line Tracking» և «համակարգչային սիմուլյացիա» ոլորտներում: 2009 թ.-ին ցուցահանդեսը կանցկացվի «Ձեր թվային ապագան» կարգախոսով:
Սկսած 2005 թ.-ից ամենամյա ցուցահանդեսն անցկացվում է ՀՀ վարչապետի բարձր հովանու ներքո:
Ցուցահանդեսի տեղեկատավական հովանավորներն են Միջազգային տեղեկատվության «Նովոստի-Արմենիա» գործակալությունը, «ԱՌԿԱ» տեղեկատվական գործակալությունը, «Պանորամա», «Banker.am», «Պանարմենիան», «Թերթ» տեղեկատվական կայքերը, «Երկիր Մեդիա» և «Արմ Նյուզ» հեռուստաալիքները, «Առավոտ», «Հայոց աշխարհ», «Ազգ», «Դելովոյ էքսպրես», «Կապիտալ», «Հայաստանի Հանրապետություն», «Իրավունք de facto» թերթերը: -0-
