Երևանի պետական համալսարան ընդունվածների թիվն այս տարի ավելացել է շուրջ 500-ով. ԵՊՀ ռեկտոր

Երևանի պետական համալսարան ընդունված ուսանողների թիվն աճել է 482-ով և կազմել 2948 ուսանող, հայտարարեց Երևանի պետհամալսարանի ռեկտոր Արամ Սիմոնյանը։

«Այս տարի մեր սպասումները ուսանողների՝ ԵՊՀ  ընդունելության կապակցությամբ լիովին արդարացվել են։ Մենք սպասում էինք մեզ մոտ տեսնել 2466 ուսանողի, փոխարենն ընդունվել է 2948 ուսանող»,- ասաց Սիմոնյանը։

Նրա խոսքերով, ուսանողների ընդունելության նման աճը բացատրվում է մի քանի պատճառներով, առաջին հերթին նրանով, որ 2010-2012 թվականներին դպրոցներում կարձանագրվի շրջանավարտների պակաս, ինչն էլ կարտացոլվի ԵՊՀ ընդունվողների թվի վրա։

Միաժամանակ, Սիմոնյանը նշեց, որ նախորդ տարվա համեմատ 2009 թվականին կտրուկ  կրճատվել է բնական գիտությունների, մասնավորապես, քիմիայի, բնապահպանության, ֆիզիկայի և կենսաբանության ֆակուլտետներ ընդունվողների թիվը։

«Ես կարծում եմ, որ մեր երիտասարդության նման անտարբերությունը բնական գիտությունների նկատմամբ մեր կրթական համակարգի լուրջ խնդիրներից է, և նման իրավիճակը հատուկ է ոչ միայն մեր բուհին, այլ նաև հանրապետության բոլոր բարձրագույն կրթական հաստատություններին, որոնց հետ միասին մենք պետք է պայքարենք»,- ընդգծեց ռեկտորը։

1919 թվականի մայիսի 16-ին ՀՀ նախարարների խորհուրդը որոշում ընդունեց Երևանում համալսարան հիմնելու մասին։ 1991 թվականին Երևանի պետական համալսարանում գոյություն ուներ արդեն 17 ֆակուլտետ, որոնք կադրեր էին պատրաստում 32 մասնագիտությամբ։

Առայսօր ԵՊՀ-ն տվել է մոտ 90 հազար շրջանավարտ։ Ներկայում համալսարանում գործող 22 ֆակուլտետում սովորում է շուրջ 13 հազար ուսանող։ Համալսարանի ավելի քան 1200 դասախոսից 200-ը գիտությունների դոկտոր է, ավելի քան 500-ը՝ գիտությունների թեկնածու։ -0-