Գալիք աշնան թիվ մեկ իրադարձությունը հայ-թուրքական հարաբերությունների հաստատումը կդառնա, կարծում է «Ժառանգություն» ընդդիմադիր խորհրդարանական խմբակցության անդամ Ստեփան Սաֆարյանը:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը:
Երկու երկրների միջև բարդ հարաբերությունների ետևում մի շարք հանգամանքներ են կանգնած՝ մասնավորապես կապված Ղարաբաղյան հարցում Անկարայի կողմից ադրբեջանական դիրքորոշմանը սատարելու, ինչպես նաև Օսմանյան կայսրությունում 1915 թ.-ին Հայերի ցեղասպանության միջազգային ճանաչման գործընթացին Թուրքիայի տված սուր արձագանքի հետ:
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար: Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները:
«Այս տեսակետից հիմնական հարցն այն է, թե կբացվի արդյոք երկու երկրների միջև սահմանը և ՀՀ նախագահը կմեկնի Թուրքիա ֆուտբոլային հանդիպումը դիտելու: Ես կարծում եմ, որ կմեկնի»,- Սաֆարյանը երեքշաբթի ասաց լրագրողներին:
Նա պարզաբանեց, որ Թուրքիան կհայտնվի լուրջ ճնշման տակ. կամ այն ստիպված կլինի բացել սահմանը ու քայլ անել Հայաստանի հետ հարաբերություններ հաստատելու ուղղությամբ, կամ ԱՄՆ կոնգրեսը կճանաչի Հայոց ցեղասպանությունը:
«Այս իրավիճակում, կարծում եմ, Թուրքիան կնախընտրի Հայաստանի հետ սահմանը բացելու տարբերակը»,- հավելեց պատգամավորը: -0-
