Հայաստանի ԱԺ նախագահը կարևորեց Երևանում ԵԱՀԿ գրասենյակի գործունեությունը:

Հայաստանի Ազգային ժողովի նախագահ Հովիկ Աբրահամյանը կարևորեց Երևանում ԵԱՀԿ գրասենյակի գործունեությունը:

Այդ մասին նա հայտարարեց երեքշաբթի Եվրոպայում անվտանգության և համագործակցության կազմակերպության (ԵԱՀԿ)  Երևանի գրասենյակի ղեկավար դեսպան Սերգեյ Կապինոսի հետ հանդիպման ժամանակ, «Նովոստի-Արմենիա» գործակալությանը հայտնեցին ՀՀ ԱԺ հասարակայնության հետ կապերի վարչությունից։

Այդ համատեքստում Աբրահամյանը կարևորեց ապրիլի 15-ին ՀՀ ԱԺ և ԵԱՀԿ Երևանի գրասենյակի միջև ստորագրված Համագործակցության հուշագիրը:

Նա նաև  բարձր գնահատեց ԵԱՀԿ-ում ստանձնված հանձնառությունների կատարման գործում ԵԱՀԿ Երևանի գրասենյակի և այլ գործադիր կառույցների ներդրումը` առանձնացնելով գրասենյակի իրականացրած ծրագրերը երկրի տնտեսական անվտանգության ամրապնդման բնագավառում:

Զրույցի ընթացքում կողմերը քննարկեցին և պայմանավորվածություններ ձեռք բերեցին Հայաստանի օրենսդրական դաշտը կատարելագործելու և եվրոպական չափանիշներին համապատասխանեցնելու ուղղությամբ ձեռնարկվելիք քայլերի վերաբերյալ:

Նրանք համակարծիք էին, որ այդ գործում մեծ դերակատարում ունեն Եվրոպայի խորհրդի Վենետիկի հանձնաժողովը և ԵԱՀԿ Ժողովրդավարական հաստատությունների և մարդու իրավունքների գրասենյակը (ԵԱՀԿ ԺՀՄԻԳ), ում համատեղ եզրակացությունները քննարկվող օրինագծերի վերաբերյալ օգտակար գործիքներ են Հայաստանի օրենսդիրների համար:

Այդ համատեքստում զրուցակիցները քննարկեցին խղճի և կրոնի ազատության, մամուլի և խոսքի ազատության, ինչպես նաև հեռուստատեսության և ռադիոյի բնագավառների օրենսդրական կարգավորման հարցերը:

Խոսնակ Աբրահամյանը և դեսպան Կապինոսը նաև խորամուխ եղան ՀՀ ԱԺ-ԵԱՀԿ համագործակցության շրջանակներում Հայաստանի խորհրդարանի մասնագիտական կարողությունների զարգացման ու ամրապնդման ծրագրերին:--0--