ԱՄՆ կառավարությունը ՀՀ ոստիկանության թրաֆիքինգի դեմ պայքարի բաժնին համակարգիչներ, ռացիաներ ու ավտոմեքենա է փոխանցել
Հուլիսի 17-ին ԱՄՆ կառավարությունը ավելի քան 40,000 ԱՄՆ դոլարի համակարգչային տեխնիկա, ռադիոսարքավորումներ և մեքենա նվիրաբերեց ՀՀ ոստիկանության կազմակերպված հանցավորության դեմ պայքարի գլխավոր վարչության թրաֆիքինգի դեմ պայքարի բաժնին:
Երկու սերվերների, համակարգիչների, տպիչների, վեց ռացիաների և «TOYOTA Corolla» ավտոմեքենայի հանձնման արարողությանը մասնակցեց ՀՀ-ում ԱՄՆ դեսպան Մարի Յովանովիչը, իսկ ՀՀ կառավարության կողմից` ՀՀ ոստիկանության պետ` ՀՀ ոստիկանության գեներալ-մայոր Ալիկ Սարգսյանը:
«Թրաֆիքինգի դեմ պայքարում ՀՀ ոստիկանությունը՝ որպես պետական կառավարման լիազոր մարմին, բավականին արդյունավետ պայքար է մղում հանցագործության այս տեսակի դեմ: Ոստիկանության քայլերը նկատվել են ինչպես հասարակական կազմակերպությունների, ընդհանուր առմամբ միջազգային հանրության, այնպես էլ այնպիսի խոշոր տերության կողմից, ինչպիսին ԱՄՆ-ն է»,- ասաց Սարգսյանը՝ երախտագիտության խոսքեր հայտնելով ամերիկյան կառավարությանը՝ ի դեմս դեսպան Յովանովիչի:
Ոստիկանության պետի խոսքերով, շատ տնտեսապես ավելի զարգացած երկրներ գտնվում են թրաֆիքինգի դեմ պայքարի ոլորտում ավելի խիստի հսկողության խմբերում, այն դեպքում, երբ Հայաստանում ավելի բարենպաստ պայմաններ են ստեղծվել տվյալ ուղղությամբ իրավապահ մարմինները հաջող աշխատանքի շնորհիվ:
Թրաֆիքինգի գծով ԱՄՆ պետդեպարտամենտի վերջին զեկույցում նշվել է ՀՀ կառավարության, հասարակական կազմակերպությունների և քաղաքացիների առաջընթացն այդ հարցում:
Իր հերթին Յովանովիչը նշեց, որ թրաֆիքինգի դեմ պայքարը հանցագործության կասեցմանը, զոհերի պաշտպանությանն ու քրեական կարգով մեղավորների հետապնդմանն ուղղված համատեղ աշխատանք է:
«Վերջին շրջանում ԱՄՆ պետքարտուղար Հիլարի Քլինթոնը նշել է Հայաստանում տեղի ունեցող դրական տեղաշարժերը»,- ասաց Յովանովիչը:
Նրա խոսքերով, Հայաստանն էական առաջընթացի է հասել թրաֆիքինգի դեմ պայքարում, սակայն դեռ շատ անելիքներ կան, և ԱՄՆ պատրաստ է օգնել Հայաստանին այդ հարցում: -0-
