Երևանյան «Ոսկե ծիրան» վեցերորդ միջազգային կինոփառատոնի շրջանակներում երեքշաբթի կկայանա Ռոբ Նիլսոնի «Հյուսիսափայլ» ֆիլմի հետահայաց ցուցադրությունը:
Արևմտյան անկախ կինոյի ներկայացուցիչ Ռոբ Նիլսոնը փառատոնի պատվավոր հյուրն է: Նրա «Հյուսիսափայլ» ֆիլմը նկարահանվել է 1978 թ.-ին: Կինոնկարը հայ հանդիսատեսին կներկայացվի առաջին անգամ:
Ինքը՝ ռեժիսորն ասաց, որ իրեն հետաքրքիր է ֆիլմի մասին հայերի կարծիքը: Սա Նիլսոնի առաջին այցն է Հայաստան, մինչ այդ նա հեռավոր պատկերացում ուներ Հայաստանի մասին:
«Ես գիտակ չեմ Հայաստանի հարցում»,- ռեժիսորն ասաց լրագրողներին: Միևնույն ժամանակ նա նշեց, որ ոչ միայն հայկական, այլև համաշխարհային կինոյի դասական Սերգեյ Փարաջանովի «Մոռացված նախնիների ստվերները» ֆիլմի երկրպագուն է:
Նա հանդիպել է Փարաջանովի հետ 1984 թ.-ին Մյունխենում, որտեղ տեսնելով դեռևս երիտասարդ Նիլսոնին՝ Փարաջանովը բացականչել է,- «Ո՞վ է այս ամերիկացի կովբոյը»:
Այժմ, ռեժիսորի խոսքերով, ինքն անհամբերությամբ սպասում է Փարաջանովի «Նռան գույնը» լեգենդար ֆիլմի ցուցադրությանը, որի հայկական տարբերակը կցուցադրվի հուլիսի 18-ին՝ փառատոնին փակման ժամանակ՝ ֆիլմի 40-ամյա և ռեժիսորի 85-ամյա հոբելյանի կապակցությամբ:
Որպես անկախ կինոյի ներկայացուցիչ՝ Նիլսոնը նշեց, որ տնտեսական ճգնաժամը ոչ միայն չի խանգարում կինոյի զարգացմանը, այլև նպաստում է լավ ֆիլմերի ստեղծմանը:
«Արվեստն իր ցանկացած դրսևորմամբ կատարելագործվում է ճնշման տակ»,- նշեց նա:
Փառատոնի շրջանակներում Նիլսոնը վարպետության դաս անցկացրեց և հույս հայտնեց, որ իր ֆիլմերը Հայաստանում կգտնեն իրենց հանդիսատեսին: «Իմ ֆիլմերը մարդկանց մասին են ու նրանց համար»,- նշեց նա:
«Ոսկե ծիրան» փառատոնը կտևի 8 օր (հուլիսի 12-19-ը): Փառատոնի 2009 թ.-ի մրցութային ծրագիրը ներկայացված է երեք հիմնական անվանակարգերում. միջազգային խաղարկային, վավերագրական ֆիլմեր և «Համահայկական համայնապատկեր»: -0-
