Ամենայն Հայոց Կաթողիկոսն ընդունեց Կիպրոսի նախագահին
Երկուշաբթի Մայր Աթոռ Սուրբ Էջմիածնում, Ամենայն Հայոց Գարեգին Բ Կաթողիկոսն ընդունեց պաշտոնական այցով Հայաստանում գտնվող Կիպրոսի Հանրապետության նախագահ Դիմիտրիս Խրիստոֆիասին` ուղեկցությամբ ՀՀ ԱԳ նախարար Էդուարդ Նալբանդյանի, «Նովոստի-Արմենիա» գործակալությանը հայտնեցին Մայր Աթոռի տեղեկատվական համակարգից։
Ողջունելով Կիպրոսի Հանրապետության նախագահի այցը հայոց հոգևոր կենտրոն` Վեհափառ Հայրապետն անդրադարձավ երկու պետությունների և ժողովուրդների միջև ստեղծված եղբայրական ջերմ կապերին` վստահությամբ, որ նախագահի այցից հետո դրանք առավել կսերտանան և իրենց բարի պտուղները կտան:
Անդրադառնալով ընդհանուր խնդիրներին և մարտահրավերներին` Նորին Սրբությունը կարևորեց ուժերի մեկտեղման ու փոխհամագործակցության անհրաժեշտությունը: Վեհափառ Հայրապետը շնորհակալություն հայտնեց Կիպրոսի նախագահ Դիմիտրիս Խրիստոֆիասին հայ համայնքի հանդեպ ջերմ և հոգատար վերաբերմունքի համար` շեշտելով, որ Կիպրոսի իշխանությունների բարյացակամ վերաբերմունքի շնորհիվ հայերը լիարժեքորեն ապրում են իրենց ազգային-եկեղեցական և մշակութային կյանքով:
Իր հերթին Դիմիտրիս Խրիստոֆիասը շնորհակալություն հայտնեց Հայոց Հայրապետին ջերմ ընդունելության համար և անդրադարձավ հայ-կիպրական կապերին, որոնք տարեցտարի ավելի են սերտանում և ամրանում:
Նա Հայոց Հայրապետին տեղեկացրեց նաև, որ վերջերս Լառնակայում բացվել է Հայոց ցեղասպանության զոհերի հիշատակին նվիրված հուշակոթող, որի բացման արարողությանը ներկա են եղել Կիպրոսի Հանրապետության իշխանությունների ներկայացուցիչները և բազմաթիվ հայեր: Նորին Սրբությունը հաջողություններ մաղթեց Կիպրոսի նախագահին։
Հանդիպմանը ներկա էին Մայր Աթոռի դիվանապետ Արշակ եպիսկոպոս Խաչատրյանը, Միջեկեղեցական հարաբերությունների պատասխանատու Եզնիկ արքեպիսկոպոս Պետրոսյանը, երկու երկրների դեսպանները, պաշտոնատար այլ անձինք: -0-
