ՀՀ նախագահ Սերժ Սարգսյանը շնորհակալություն հայտնեց Վրաստանի կառավարությանը հայ հայրենակիցների խնդիրների նկատմամբ ուշադրություն ցուցաբերելու համար։
«Վրաց հասարակության անբաժանելի մասն է վրացահայ համայնքը, որը բարեկամության յուրօրինակ կամուրջ է երկու երկրների միջև: Ցանկանում եմ Վրաստանի կառավարությանը շնորհակալություն հայտնել` մեր հայրենակիցների խնդիրների և սպասումների նկատմամաբ մշտական ուշադրության համար: Վստահ եմ, որ առաջիկայում ևս Վրաստանի ղեկավարության ուշադրության կենտրոնում կլինեն ինչպես հայաբնակ տարածաշրջանների, այնպես էլ ընդհանրապես Վրաստանի ողջ հայ բնակչության սոցիալ-տնտեսական ու կրթամշակութային հարցերը»,- հայկական պետության ղեկավարի մամուլի ծառայությունից հինգշաբթի մեջբերեցին Սարգսյանի խոսքերը Վրաստանի նախագահ Միխայիլ Սահակաշվիլիի՝ Հայաստան կատարած պաշտոնական այցի պատվին տված ընդունելության ժամանակ ունեցած ելույթից:
ՀՀ նախագահն ընդգծեց, որ հայկական սփյուռքում գիտեն իր վերաբերմունքը`«լավ հայ լինելու համար Սփյուռքի հայը ուղղակի պարտավոր է լինել ազնիվ, հարգված, պահանջված քաղաքացին այն երկրի, որտեղ նա ապրում է»:
«Արվեստի, բիզնեսի, գիտության և կրթության աշխարհում` ամենուր նրանք իրենց արժանի ներդրումն են ունեցել`ի շահ Վրաստանի բարգավաճման: Սայաթ Նովա, Փարաջանով, Մանթաշով, Արամյանց` Վրաստանի ականավոր հայերի այս ցանկը կարելի է անվերջ թվարկել: Պարոն նախագահ, մենք պարտավոր ենք անել ամեն ինչ, որպեսզի փոխադարձ սիրո այս մարդկային կամուրջը շարունակի լինել ժողովուրդների միջև բարեկամության մարմնավորում և օրինակ»,- ընդգծեց Սարգսյանը:
Հայ առաջնորդը նշեց նաև ուսանողական փոխանակումերի խրախուսման, երիտասարդ մասնագետների, գիտնակաների, մշակութային գործիչների համագործակցության ծրագրերի զարգացման անհրաժեշտությունը։
«Այսօր մեզ հետ այս դահլիճում է Հայաստանի ամենահայտնի վրացուհին` Գիտությունների Ազգային Ակադեմիայի անդամ, ականավոր հասարակական գործիչ Թինա Լևանի Ասաթիանին: Նա իր ողջ կենսակերպով ապացուցել է, թե ինչքան շատ բաների մենք կարող ենք հասնել միասին»,- ասաց Սարգսյանը:-0-
