Սպիտակ քաղաքում ծրագրվում է արհեստների պալատ հիմնել, տեղեկացրել է նախագծի նախաձեռնող, ֆրանսահայ գործարար Հովհաննես Հեքիմյանը ՀՀ սփյուռքի նախարար Հրանուշ Հակոբյանի հետ հանդիպման ընթացքում։
Ինչպես «Նովոստի-Արմենիա» գործակալությանը տեղեկացրեցին ՀՀ սփյուռքի նախարարության մամուլի ծառայությունից, հանդիպման ընթացքում Հեքիմյանը նշել է, որ այդ նախագծի նպատակն է աջակցել ամենատարբեր արհեստների տիրապետող մարդկանց համախմբմանը, նրանց ուսուցման որակի բարելավմանը, իրավական, սոցիալական, առողջապահական խնդիրներում նրանց իրավունքների պաշտպանությանը:
Հակոբյանն իր հերթին գոհունակություն է հայտնել Հայաստանում նման կառուցողական գաղափարի ներդրման կապակցությամբ ու խոստացել է անվերապահ աջակցություն հայրենաշեն բոլոր ծրագրերում։
Պայմանավորվածություն է ձեռք բերվել բացել Մադրիդում գործող Սուրբ Լազար կենտրոնի մասնաճյուղ Սպիտակում, որը բժշկական սարքավորումներ է նվիրաբերելու Հայաստանին։
Նախարարը ողջունել է այդ ձեռնարկը և հայտնել իր պատրաստակամությունը աջակցել այդ ծրագրին։-0-
