ՀՀ վարչապետ Տիգրան Սարգսյանը Երևանի Ավագանու խորհրդի ընտրություններին քվեարկել է հանուն կայունության։
«Ես քվեարկել են հանուն կայունության և շարունակականության, որպեսզի մենք բոլորս միասին համատեղ ջանքերով կարողանանք հաղթահարել բոլոր դժվարությունները», - ասաց նա կիրակի լրագրողներին քվեարկությունից հետո։
Երևանում մայիսի 31-ին անցկացվում են Ավագանու խորհրդի առաջին ընտրությունները: «Երևանում տեղական ինքնակառավարման մասին» նոր օրենքի համաձայն՝ նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ավագանու խորհրդում կստանա տեղերի մեծամասնությունը:
Սարգսյանը նաև նշեց, որ այսօր Հայաստանին կայունություն է անհրաժեշտ, և դա պայմանավորված է ոչ միայն ներհանրապետական, այլև համաշխարհային գործընթացներով։
«Այն երկրները, որոնք կարողանում են ապահովել կայունություն, կարողանում են ավելի լավ հաղթահարել համաշխարհային ֆինանսատնտեսական ճգնաժամի բացասական հետևանքները», - ընդգծեց նա։
Պատասխանելով լրագրողներին այն հարցին, թե կկարողանա՞ն, արդյոք, երկրի քաղաքական ուժերն ընդունել ընտրությունների ցանկացած ելք՝ ՀՀ կառավարության ղեկավարն ասաց, որ հույս ունի, որ այդպես կլինի։
«Մենք պետք է ձևավորենք նոր ավանդույթ, որ պարտվող կողմը ունենա համարձակություն ընդունելու իր պարտությունը», - ավելացրեց Սարգսյանը։
ՀՀ վարչապետը ժամանել է Երևանի Լևոն Շանթի անվան դպրոցում ձևավորված 10/31 ընտրատեղամաս՝ կնոջ և երկու որդիների ուղեկցությամբ։ Մինչ Սարգսյանի ժամանումը այդ ընտրատեղամասում արդեն քվեարկել էր գրանցված 1914 ընտրողներից 319-ը։
Երևանի Ավագանու խորհրդի ընտրություններն անցկացվում են համամասնական ընտրակարգով:
Ընտրություններին մասնակցում են «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։ --0—
