ԵՐԵՎԱՆ, 28 մայիսի. /Նովոստի-Արմենիա/. Կազակների հայկական համաշխարհային կոնգրեսի (ԿՀՀԿ) ատաման, կազակական գեներալ Սերգեյ Մադաթյանը հայտարարեց, որ խղճում է Ադրբեջանում բնակվող կազակներին։
«Ադրբեջանի կազակների ատաման Վիկտոր Մերեշկինի հարցազրույցից տեղեկանալով ուղղափառ կազակական երիտասարդության համաշխարհային համագումարին Ադրբեջանի պատվիրակության բացակայության պատճառի մասին՝ մենք խղճացինք ադրբեջանաբնակ կազակներին»,- ասաց Մադաթյանը Ռուսաստանի հայերի «Երկրամաս» թերթին տված հարցազրույցում։
Սերգեյ Մադաթյանի կարծիքով՝ գոյություն ունեն նման իրավիճակի երկու պատճառներ. Առաջինը՝ երկրի ղեկավարների մոտ տեղեկատվության բացակայությունն է կազակական խավի գոյության մասին իրենց տարածքում, երկրորդը՝ երբ ղեկավարությունը գիտի հանրապետությունում կազակների առկայության մասին, բայց լիովին անտարբեր է այդ խավի նկատմամբ։
«Եվ այս, և մյուս դեպքում գլխավոր մեղավորությունը ադրբեջանական կազակականության ատաման Վիկտոր Մերեշկինինն է, ով նյութական աջակցության բացակայության համար լաց լինելու փոխարեն պետք է գործարար կապեր հաստատի պաշտոնյաների հետ և ավելի ակտիվ քարոզի կազակական ավանդույթները, որպեսզի ճանաչման և հաջողության հասնի ղեկավարության և ժողովրդի մոտ»,- ասաց Մադաթյանը։
«Վերջիվերջո, ատաման Մերեշկինը կարող էր օգնության համար դիմել Հայաստանի կազակականությանը և անգամ անձամբ ինձ, քանի որ մենք ծանոթ ենք։ Ես անպայման կօգնեի պատվիրակություն ուղարկել Վոլգոգրադ։ Չէ՞ որ փոխադարձ աջակցությունը կազակականության շրջանում բազմադարյա գլխավոր ավանդույթներից մեկն է»,- նշեց ԿՀՀԿ ատամանը։
Զուգահեռներ անցկացնելով Ադրբեջանի և Հայաստանի կազակականության դրության միջև՝ Սերգեյ Մադաթյանն ընդգծեց, որ ի տարբերություն Ադրբեջանի ղեկավարության, հայկական ղեկավարությունը և բարերարները հավանություն են տվել ԿՀՀԿ պատվիրակության մասնակցությանը համագումարին և հնարավորինս աջակցություն են ցուցաբերել։
«Կցանկանայի Մերեշկինին խորհորդ տալ վերջ տալ թշնամանքին հարևանների նկատմամբ, քանի որ դա նրան պատիվ չի բերում և հեղինակություն չի ավելացնում։ Ավելին, մենք բոլորս հիշում ենք, որ մի քանի տարի առաջ Մերեշկինը արդարանում էր կազակների առջև իր հակահայկական ելույթների համար՝ բացատրելով դրանց հայտնվելը ադրբեջանցի լրագրողների ապատեղեկատվութայմբ։ Արդեն այն ժամանակ՝ 2005 թվականի դեկտեմբերի 17-ին, Մերեշկինը կանգնած էր իմ առջև այլ ատամանների ներկայությամբ՝ գլուխը կախ՝ ինչպես մեղավոր աշակերտ, և լսում էր իմ մեղադրանքները»,- ասաց Մադաթյանը։
ԿՀՀԿ ատամանը կարծում է, որ Մերեշկինի համար կազակականությունը սեփական բարիքներ ստանալու և երկրի խորհրդարան մուտք գործելու ուղի է։ «Դրա հետ են կապված նրա ամպագոռգոռ հայտարարությունները, որոնց նույնիսկ ամենափոքր բաժինը նա ի վիճակի չէ կատարելու։ Կարծում եմ, որ Ադրբեջանի կազակների թվում կան մարդիկ, ում հետ կարելի է կառուցողական երկխոսություն վարել, բայց Մերեշկինը դրանց թվում չէ»,- ասաց կազակների ատաման Սերգեյ Մադաթյանը «Երկրամաս» թերթին տված հարցազրույցում։
15 հոգուց բաղկացած հայկական պատվիրակությունը՝ Կազակների հայկական համաշխարհային կոնգրեսի (ԿՀՀԿ) ատաման, կազակական գեներալ Սերգեյ Մադաթյանի գլխավորությամբ, մայիսի 13-17-ը մասնակեցե Վոլգոգրադում անցկացված Կազակական ուղղափառ երիտասարդության համաշխարհային երկրորդ համագումար-փառատոնին։
Բեմադրվել էին նոր պարեր, առաջին անգամ հայ երեխաները հանդես եկան երիտասարդության ուղղափառ տոնին՝ ցուցադրելով իրենց արվեստը երիտասարդական դիվանագիտության շրջանակներում։ Համագումարի շրջանակներում պատվիրակությունները կատարել են իրենց ժողովուրդների պարերը, մասնակցել մարզական մրցումների և տարբեր թեմաներով սեկցիոն աշխատանքների: Հայկական պատվիրակության ներկայացուցիչները Հայաստանի և Արցախի դրոշները բարձրացրեցին Մամաև կուրգանում։--0—
