ԵՐԵՎԱՆ, 21 մայիսի. /Նովոստի-Արմենիա/. Jethro Tull լեգենդար ռոք-խմբի կոմպոզիտոր, հիմնադիր և առաջատար Յան Անդերսոնը Երևանում համերգով հանդես գալը բացառիկ հնարավորություն է համարում։
Համաշխարհային ռոքի լեգենդ բրիտանական Jethro Tull խումբն առաջին անգամ համերգով հանդես կգա Երևանում մայիսի 22-ին։
«Մենք անհամբեր սպասում ենք վաղվա համերգին, որի ընթացքում մեծ հաճույքով կներկայացնենք մեր հին ու նոր ստեղծագործությունները։ Բրիտանացի ու ամերիկացի երաժիշտները հաճախ չէ որ ժամանում են Երևան այս հրաշալի երկրում համերգներ տալու համար, և մենք կարծում ենք, որ մեզ՝ որպես արևմտյան խմբի, Հայաստանում համերգով հանդես գալու և մեր երաժշտությունը ներկայացնելու բացառիկ հնարավորություն է վիճակվել»,- հինգշաբթի Երևանում մամուլի ասուլիսի ժամանակ ասաց նա։
Jethro Tull խումբը ստեղծվել է 1968թ. Մեծ Բրիտանիայում: Մինչ օրս թողարկել է 40-ից ավելի ալբոմ, վաճառվել է մոտ 60 միլիոն օրինակ, ունեցել է 2500-ից ավելի համերգ մոտ 40 երկրում:
Խոսելով այն մասին, թե կոնկրետ ինչ երգեր են կատարվելու երևանյան համերգի ժամանակ, Անդերսոնն ասաց, որ «երբ Jethro Tull-ը որևէ երկրում հանդես է գալիս առաջին անգամ, ապա փորձում է այնպիսի երգեր ընտրել, որոնք լիարժեք պատկերացում ստեղծեն խմբի երաժշտական գործունեության մասին»։
«Վաղվա համերգին մենք կկատարենք 1960-ականների մեր վաղ ալբոմների ստեղծագործություններ»,- ասաց նա՝ պարզաբանելով, որ եթե երաժիշտները երկրում հանդես գային երկրորդ կամ երրորդ անգամ, համերգի երգացանկը շատ ավելի լայն կլիներ և կընդգրկեր 1980-90-ականների ստեղծագործություններ։
Անդերսոնի խոսքերով, խմբի մասնակիցները երբեք պատկերացում չունեն այն մասին, թե ինչ լսարան կլինի համերգին։
«Մենք մեր լսարանին ծանոթանում ենք անմիջապես համերգի ժամանակ, և այս առումով, ինձ թվում է, որ վաղվա ելույթն անակնկալ կլինի ինչպես մեր, այնպես էլ հանդիսատեսի համար»,- ընդգծեց նա։
Պատասխանելով լրագրողների այն հարցին, թե որքան լայն է Հայաստանի մասին իր իմացությունը, Անդերսոնն ասա, որ սովորաբար ինքը նոր երկրի հետ ծանոթանում է հյուրանոցի պատուհանից կամ Ինտերնետի էջերից, սակայն Հայաստան գալով ինքն արդեն հասցրել է զբոսնել երևանյան փողոցներով ու ծանոթանալ քաղաքին։
«Հայաստանում աշխարհի ամենագեղեցիկ աղջիկներն են ապրում, բացի այդ ես վստահ եմ, որ Հայաստանը «Եվրատեսիլ» երգի մրցույթի հաղթող կդառնա հաջորդ տարի»,- ասաց նա։
Խմբի առաջատարը նշեց նաև, որ իր համար լավագույն փոխհատուցումը որպես երաժշտի իր երկարատև երաժշտական կարիերան է, որն այս տարի 41 տարեկան կդառնա։
«Ես ուրախ եմ, որ հնարավորություն ունեմ հանդես գալ այլ երաժիշտների հետ, լսել նրանց երաժշտությունը։ 41 տարին ոչ թե գոյատևում է, այլ հաճույքով ապրած տարիներ»,- ընդգծեց նա։
Իր հերթին, Jethro Tull խմբի կիթառահար Մարտիկ Բարը հույս հայտնեց, որ ոչ միայն խմբին կհաջողվի ցույց տալ իրեն ու իր արվեստը, հանդիսատեսը ևս կկարողանա ներկայացնել իր երկիրը։
«Ձեր երկիրը մեզ հետաքրքիր է և մենք կուզենայինք ավելի շատ իմանալ նրա մասին»,- ասաց նա։
Խմբի անդամներն են Յան Անդերսոնը (Ian Anderson), Մարտին Բարրը (Martin Barre), Դևիդ Գուդյերը (David Goodier), Ջոն Օ' Հարան (John O'Hara), Մարկ Մոնդեսիրը (Mark Mondesir):
Համերգի կազմակերպիչն է «VIBROGRAPHUS» ընկերությունը, գլխավոր հովանավորներն են «Լույս» հիմնադրամն ու Ամերիաբանկը:
Տեղեկատվական հովանավորներն են «Նովոստի-Արմենիա» գործակալությունը, HAI FM 105.5 ռադիոկայանը, Հայաստանի Հանրայաին հեռուստատեսությունը-0-
