Հայաստանն ու Հնդկաստանը շահագրգռված են երկկողմ հարաբերությունների հետագա զարգացմամբ և խորացմամբ, այս մասին նշվել է ՀՀ ԱԳ նախարար Էդվարդ Նալբանդյանի և Հնդկաստանի ԱԳՆ Եվրասիայի համակարգող քարտուղար Դիվյաբ Մանչանդայի միջև տեղի ունեցած հանդիպման ժամանակ։
Ինչպես երկուշաբթի «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից, Նալբանդյանը նշել է, որ Հայաստանը բարձր է գնահատում հայ-հնդկական ավանդական ջերմ ու բարեկամական հարաբերությունները և շահագրգռված է դրանց հետագա զարգացմամբ և խորացմամբ:
«Նալբանդյանը կարևորել է քաղաքական երկխոսության ակտիվացումը և տնտեսական ու մշակությաին համագործակցության խորացման նպատակով անհրաժեշտ քայլերի ձեռնարկումը», - տեղեկացրեցին ԱԳՆ-ից։
Հնդկաստանի ԱԳՆ Եվրասիայի համակարգող քարտուղար Դիվյաբ Մանչանդան նշել է, որ Հնդկաստանում առանձնահատուկ ջերմությամբ են վերաբերվում Հայաստանին ու հայ ժողովրդին, և երկրի իշխանությունները նպատակադրված են ընդլայնել Հայաստանի հետ բարեկամական գործընեկերությունն ու համագործակցությունը:
Հանդիպման ընթացքում կողմերը հանգամանալից զրույց են ծավալել տարբեր բնագավառներում երկկողմ հարաբերությունների հետագա ընդլայնման ուղիների շուրջ, ինչպես նաև միջազգային կազմակերպություններում համագործակցության սերտացման վերաբերյալ:-0-
