Զատուլին. ՌԴ ԱԳՆ-ն պատրաստվում է հարցում ուղարկել ՀՀ ԱԳՆ-ին՝ իրավիճակը պարզաբանելու համար

ԵՐԵՎԱՆ, 25 հոկտեմբերի./Նովոստի-Արմենիա/. Պետդումայի ԱՊՀ գործերով, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը հայտարարել է, որ ՌԴ ԱԳՆ-ն պատրաստվում է հարցում ուղարկել Հայաստանի ԱԳՆ-ին՝ իրավիճակը պարզաբանելու համար։

Երեքշաբթի ավելի վաղ վարչապետի ընտանիքին պատկանող «Հայկական ժամանակ»-ը հայտնել էր, որ Զատուլինի մուտքը Հայաստան արգելված է, և նա այժմ համարվում է անցանկալի անձ։ Ինքը՝ Զատուլինը, դա վիրավորական քայլ է անվանել։ Իր տելեգրամ ալիքում նա նշել է, որ այս որոշումը սիմպտոմատիկ է և վկայում է Հայաստանի իշխանությունների նոր կուրսի մասին։

«Ռուս-հայկական հարաբերություններում սա առաջին նման դեպքն է խորհրդարանական կորպուսի ներկայացուցչի նկատմամբ»,- ընդգծել է Զատուլինը։

Նա «Վեդոմոստի»-ին ասել է, որ տեղյակ չէ, թե իր որ հայտարարությունները կարող էին հանգեցնել Հայաստանի իշխանությունների նման արձագանքին։

Զատուլինն ասել է, որ իրեն «մտահոգում է» հանրապետության ղեկավարության քաղաքականությունը», որը, նրա կարծիքով, կողմնորոշված է «Արևմուտքի շահերին»։

Զատուլինի Հայաստան մուտքի արգելքը «Հայկական ժամանակ»-ը բացատրում է նրանով, որ իր հրապարակային հարցազրույցներում պատգամավորը բազմիցս մեղադրել է ՀՀ իշխանություններին 44-օրյա պատերազմում պարտության մեջ։ -0-