ԵՐԵՎԱՆ, 28 դեկտեմբերի./Նովոստի-Արմենիա/. Իշխանամետ պատգամավոր, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը Հանրային հեռուստաընկերության եթերում մեկնաբանել է շրջանառվող տեղեկություններն այն մասին, որ Հայաստանին փորձում են ստիպել մուտք գործել Ռուսաստան-Բելառուս միութենական պետություն:
Օրերս ՀՀ ԱԽ քարտուղար Արմեն Գրիգորյանը հայտարարել է, որ «Միութենական պետության մասով Հայաստանի վրա գործադրվում է մեծ ճնշում», բայց չի կոնկրետացրել, թե կոնկրետ ում կողմից է գալիս ճնշումը:
Հանրային հեռուստաընկերության լրագրողի այն հարցին, թե «դա բարձրաստիճան պաշտոնյայի կողմից հնչվող տե՞քստ է, թե՞ դա իսկապես ուղիղ սպառնալիք է Ռուսաստանի կողմից, որին մենք հիմա դիմադրում ենք», Քոչարյանը պատասխանել է հետևյալ կերպ.
«Ճնշումների մասին միշտ կարելի է խոսել, դեռ 90-ականներն կար միութենական պետություն ստեղծելու ծրագիր, ստորագրություններ էին հավաքում, կոորդինացիոն խումբ էր ստեղծված, Հայաստան, Ռուսաստան Բելառուս այդպիսի միության մասին էր խոսքը, և այդ գաղափարը եկել, հասել է մինչև մեր օրեր: Հիմա էլ կա այդպիսի գաղափար: Վերջին հաշվով Ռուսաստանը Բելառուսի հետ միութենական պետություն ստեղծելու ճանապարհին կուզի, որպեսզի հնարավորինս շատ մասնակիցներ տեսնի այդ միության մեջ:
Ռուսաստանի կողմից մեզ ուղիղ ստիպելու մասին ես չեմ կարող ասել, բայց որ նպատակաների մեջ տեսանելի են, որ այդպիսի ցանկություններ շրջանառության մեջ գոյություն ունեն, կարող եմ ասել: Վերջին հաշվով այս ամենը բերում, կապում են նաև մեր անվտանգային միջավայրի կայունության և կայունությունը պահելու հետ, որը խոսում է այն մասին, որ այստեղ ինչ-որ բան այն չէ նպատակների ու ցանկությունների տեսանկյունից»:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում