ԵՐԵՎԱՆ, 13 սեպտեմբերի./Նովոստի–Արմենա/. ՌԴ ԱԳՆ-ն ծայրահեղ մտահոգություն է հայտնել այս տարվա սեպտեմբերի 13-ի գիշերը հայ-ադրբեջանական սահմանի առանձին հատվածներում իրավիճակի կտրուկ սրման կապակցությամբ։
«Հայաստանի ղեկավարությունից ստացվել է դիմում՝ աջակցելու իրավիճակի կարգավորմանը՝ առկա երկկողմ պայմանավորվածություններին համապատասխան և ՀԱՊԿ-ի միջոցով: Մենք ակնկալում ենք, որ Ռուսաստանի միջնորդության արդյունքում` Մոսկվայի ժամանակով 9.00-ից հրադադարի մասին ձեռք բերված համաձայնությունը կիրականացվի ամբողջությամբ»,- հայտարարել են գերատեսչությունից։
ՌԴ ԱԳՆ-ն «կողմերին կոչ է արել ձեռնպահ մնալ իրավիճակի հետագա սրումից, դրսևորել զսպվածություն և խստորեն պահպանել հրադադարի ռեժիմը՝ համաձայն Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի, հունվարի 11-ի և նոյեմբերի 26-ի եռակողմ հայտարարություններին համապատասխան»։
ՌԴ ԱԳՆ-ից նշել են, որ սերտ կապի մեջ են Բաքվի ու Երևանի հետ։
«Մենք շարունակում ենք ելնել նրանից, որ Հայաստանի և Ադրբեջանի միջև բոլոր վիճելի հարցերը պետք է լուծվեն բացառապես քաղաքական և դիվանագիտական ճանապարհով, իսկ սահմանային հարցերի դեպքում՝ հայ–ադրբեջանական սահմանի սահմանազատման երկկողմ հանձնաժողովի աշխատանքի շրջանակում` Ռուսաստանի խորհրդատվական աջակցությամբ», – նշվում է հաղորդագրության մեջ։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում