Հունգարիան պատրաստ է միջնորդական դեր խաղալ՝ նպաստելու Ադրբեջանում պահվող հայ ռազմագերիների՝ հայրենիք անվտանգ վերադարձին. դեսպան

ԵՐԵՎԱՆ, 6 հոկտեմբերի./Նովոստի–Արմենիա/. Հունգարիան պատրաստ է միջնորդական դեր խաղալ՝ նպաստելու Ադրբեջանում պահվող հայ ռազմագերիների՝ հայրենիք անվտանգ վերադարձին։

Այս մասին «Արմենպրես»–ին հայտարարել է է Հայաստանում Հունգարիայի դեսպան (նստավայրը՝ Թբիլիսի) Աննա Մարիա Սիկոն:

Սեպտեմբերի վերջին լուրեր էին տարածվել, որ ԵՄ արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելի անունից տարածված հայտարարությունը, որը խստորեն դատապարտում էր Ադրբեջանին, ի սկզբանե պետք է լիներ ԵՄ անդամ 27 երկրի ընդունած համատեղ հայտարարություն, սակայն Հունգարիան վետո էր կիրառել հայտարարության ընդունման նկատմամբ:

Հայաստանում Հունգարիայի դեսպանը ԵՄ հայտարարության վերաբերյալ այս հրապարակումները համարում է փաստերի և իրականության վրա չհիմնված մեղադրանքներ։

«Մի քանի անդամ երկրներ, այդ թվում՝ Հունգարիան, մեկնաբանություններ են արել նախատեսված համատեղ հայտարարության վերաբերյալ, վերջում չի հաջողվել կոնսենսուս ձեռք բերել, ուստի այն հրապարակվել է Բարձր ներկայացուցիչ Ժոզեպ Բորելի անունից»,-պարզաբանել է դեսպանը:»

Իսկ թե ի՞նչ դիրքորոշում ունի Հունգարիան դեռ 2021-ի մայիսից Ադրբեջանի կողմից Հայաստանի տարածքային ամբողջականությունը խախտելու փաստի վերաբերյալ՝ դիվանագետը վստահեցրել է, որ միջազգային իրավունքի հիման վրա Հունգարիան հավատարիմ է մնում ինքնիշխան պետությունների տարածքային ամբողջականության անձեռնմխելիության սկզբունքին։ Բազմաթիվ առիթներով են հստակեցրել իրենց դիրքորոշումն այս առնչությամբ։ Հունգարիան ցանկանում է, որ մարդկային տառապանքներին վերջ տրվի, որ յուրաքանչյուր մարդ հնարավորություն ունենա խաղաղ ապրել: Դեսպանը վստահեցնում է, որ Հունգարիան միշտ աջակցել է այս նպատակով նախաձեռնություններին և կշարունակի դա անել:
2021 թվականի դեկտեմբերին Հունգարիայի կառավարության միջնորդությամբ Ադրբեջանում ապօրինաբար պահվող 5 հայ ռազմագերի էր վերադարձել հայրենիք:

Հայ-հունգարական հարաբերությունների մասին

Հայաստանը դադարեցրել էր դիվանագիտական հարաբերությունները Հունգարիայի հետ 2012 թվականին այն բանից հետո, երբ Հունգարիան հայ սպա Գուրգեն Մարգարյանի սպանության համար Հունգարիայում ցմահ ազատազրկման դատապարտված և հայրենիքում ներում շնորհված Ռամիլ Սաֆարովին արտահանձնեց Ադրբեջանին։

2022 թվականի դեկտեմբերի 1-ին Հայաստանի և Հունգարիայի արտաքին գործերի նախարարները պայմանավորվեցին վերականգնել դիվանագիտական հարաբերությունները։ Այս տարվա մայիսին՝ 11 տարվա դիվանագիտական հարաբերությունների բացակայությունից հետո, երկրները նշանակեցին ոչ ռեզիդենտ դեսպաններ՝ Հայաստանում Հունգարիայի դեսպան է դարձել Աննա Մարիա Սիկոն (նստավայրը՝ Թբիլիսի), իսկ Աշոտ Սմբատյանը (միաժամանակ՝ ՀՀ դեսպանը Վրաստանում, նստավայրը՝ Թբիլիսի) դարձել է Հունգարիայում ՀՀ դեսպան):-0-