ԵՐԵՎԱՆ, 17 օգոստոսի. /Նովոստի-Արմենիա/. Հայաստանի երկրորդ նախագահ Ռոբերտ Քոչարյանը «Երկիր մեդիա» հեռուստաընկերությանը հարցազրույցում նշել է, որ Ռուսաստանի հետ չի կարելի խոսել այն կերպ, ինչպես հիմա դա անում է Հայաստանի կառավարությունը:
Օգոստոսի 10-ին ՀՀ վարչապետ Նիկոլ Փաշինյանը Տավուշ կատարած այցի ժամանակ հայտարարել է, որ բոլորը պետք է ադապտացվեն Հայաստանում ստեղծված նոր իրավիճակին՝ այդ թվում ռուս գործընկերները:
«Երբ վարչապետը հայտարարում է, որ ամբողջ աշխարհը պետք է հարմարվի Հայաստանի նոր իրավիճակին, դա ասվում է նաև Ռուսաստանին: Ռուսաստանն այն երկիրը չէ, ում հետ կարելի է նման ձև խոսել: Մեր ստրատեգիական գործընկերն է, և առանց այդ ստրատեգիական գործընկերության մեր պաշտպանության հարցը շատ մեծ վտանգի տակ է», - նշել է նա:
Այդ համատեքստում Քոչարյանը բացասական գնահատեց երեկ «Հարավկովկասյան երկաթուղում» կատարած խուզարկությունը: «Այսօրվա իշխանությունները ուղակի չեն գիտակցում իրական վտանգները, չեն պատկերացնում աշխարհաքաղաքական իրավիճակը: Անում են մի կարգի հայտարարություններ, բայց գործնականում մենք տեսնում ենք այլ կարգի քայլեր», - ասել է նա:
Հայկական ԶԼՄ-ները նայտնում են, որ օգոստոսի 15-ի գիշերը Պետեկամուտների կոմիտեի աշխատակիցները դիմակավորված անձանց ուղեկցությամբ խուզարկություն են կատարել «Հարավկովկասյան երկաթուղի» ընկերության հրասենյակներում:-0-