ԵՐԵՎԱՆ, 24 ապրիլի./Նովոստի–Արմենիա/. Ընդդիմության առաջնորդ Նիկոլ Փաշինյանը կարևորել է Հայաստան–Ռուսաստան հարաբերությունները։
«Ռուսաստանի և Հայաստանի հարաբերությունները շատ–շատ կարևոր են։ Դա նշանակում է, որ կասկած չկա, որ Ռուսաստանը և Հայաստանը բարեկամ պետություններ են, սակայն դա չի նշանակում, որ մեր հարաբերություններում չկան խնդիրներ։ Սակայն մենք մտադիր ենք ոչ թե քննադատել դրանք, այլ լուծել երկխոսության և բանակցությունների միջոցով։ Վստահ եմ, որ այդ խոսակցությունը Ռուսաստանի հետ կհաջողվի», – ասաց նա երեքշաբթի միջազգային լրատվամիջոցների համար կազմակերպված ասուլիսի ժամանակ։
Խոսելով խնդիրների մասին` Փաշինյանը նշեց, որ դրանք առաջին հերթին կապված են տարածաշրջանի և ՌԴ–ում ՀՀ քաղաքացիների իրավունքների հետ։
Загружается новость ... "Лево"
«Մյուս խնդիրը կապված է Արցախի և ՌԴ–ի կողմից Ադրբեջանին զենք վաճառելու հետ։ Կարծում եմ, որ խախտվում է ուժերի հավասարակշռությունը Ադրբեջանի և Հայաստանի միջև, և Ռուսաստանը, վաճառելով զենք Ադրբեջանին, կամա թե ակամա նպաստում է դրան», – ասաց նա։
Փաշինյանի խոսքով, կան նաև տնտեսության հետ կապված խնդիրներ, քանի որ շատ հայկական ձեռնարկություններ ունեն որոշակի խնդիրներ` կապված ռուսական շուկա դուրս գալու հետ։
«Ամեն դեպքում կարծում եմ, որ չկան չլուծվող հարցեր, պարզապես հարկավոր է լինել համբերատար և դրական տրամադրվել», – ավելացրեց նա։
Երկրի կառավարության ձևավորման համատեքստում Փաշինյանն ընդգծեց, որ դա Հայաստանի ներքին գործն է։
«Իսկ Ռուսաստանը բարեկամ երկիր է Հայաստանի և նրա ժողովրդի համար, և մենք ունենք շատ լավ հարաբերություններ երկու երկրների միջև և վստահ եմ, որ Ռուսաստանը կհարգի Հայաստանի ժողովրդի որոշումը», – եզրափակեց նա։
Հայաստանում ապրիլի 13–ից մեկնարկած մասշտաբային բողոքի ակցիաների ֆոնին ապրիլի 23–ին ՀՀ վարչապետ Սերժ Սարգսյանը հրաժարական տվեց։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։–0–
