ԵՐԵՎԱՆ, 6 մարտի. /Նովոստի-Արմենիա/. Հայ ազգային կոնգրես և Հայաստանի ժողովրդական կուսակցություն (Կոնգրես - ՀԺԿ) դաշինքի նախընտրական ցուցակը գլխավորող ՀՀ առաջին նախագահ Լևոն Տեր-Պետրոսյանի բացակայությունը դաշինքի վերջին միջոցառումներին կապված չէ նրա առողջական վիճակի հետ, հայտարարեց ՀԱԿ խմբակցության ղեկավար Լևոն Զուրաբյանը:
Տեր-Պետրոսյանը չի մասնակցել 2008 թ.-ի մարտի 1-ի ողբերգական իրադարձությունների հիշատակին նվիրված ավանդական բողոքի ակցիային, ինչպես նաև Կոնգրես-ՀԺԿ դաշինքի նախընտրական ծրագրի ներկայացմանը: Մեկ տարի առաջ նրան վիրահատել էին ԱՄՆ-ում։ Նրա մոտ ախտորոշվել էր աղիների քաղցկեղ:
«Տեր-Պետրոսյանն իր ոճն ունի: Նա երբեք չի ենթարկվում ընդունված էլեկտորալ տեխնոլոգիաներին: Ընդ որում, դա նորություն չէ: Այդպես է եղել նաև 1988 թ.-ին և 1991 թ.-ին և հետագայում էլ: Այդ մասին, ի դեպ, մի անգամ խոսել է նաև ՌԴ առաջին նախագահ Ելցինը. «Տեր-Պետրոսյանը հազվադեպ է խոսում, բայց` դիպուկ»», - «Նովոստի-Արմենիա» գործակալությանն ասաց Զուրաբյանը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
