ԵՐԵՎԱՆ, 30 նոյեմբերի. /Նովոստի–Արմենիա/. ՀՀ ԱԺ փոխխոսնակ, ՀՀԿ գործադիր մարմնի անդամ Էդուարդ Շարմազանովը մեկնաբանել է НТВ ռուսական հեռուստաալիքի talk show–ի ընթացքում Հայաստանի հասցեին հնչած հայտարարությունները։
НТВ հեռուստաալիքի եթերով հեռարձակվող «Հանդիպման վայր» հաղորդման վերջին եթերը գրեթե ամբողջությամբ նվիրված էր ԵՄ–ի հետ ստորագրված համաձայնագրի քննարկմանը, որտեղ Հայաստանին մասնավորապես համեմատեցին անհավատարիմ կնոջ հետ։
Загружается новость ... "Лево"
Հայաստան–ԵՄ համապարփակ և ընդլայնված գործընկերության համաձայնագիրը ստորագրվել է նոյեմբերի 24–ին ԵՄ «Արևելյան գործընկերության» ծրագրի 5–րդ գագաթնաժողովի շրջանակում։ Այն որոշ իմաստով համահունչ է ԵՄ–ի հետ ասոցացման պայմանագրի նախագծի հետ, որը Հայաստանը պետք է ստորագրեր 2013 թ.–ի նոյեմբերին։ Սակայն չստորագրեց, քանի որ հայտարարեց, որ ցանկանում է մուտք գործել Մաքսային միություն և մասնակցել եվրասիական ինտեգրմանը։
«Անհեթեթ, տգետ գնահատականներ են, որոնք չեն բխում մեր ժողովուրդների բարեկամական, դաշնակցային հարաբերություններից: Եվ ես չեմ կարծում, որ ճիշտ է, որպեսզի իմ պետության Ազգային ժողովի նախագահի տեղակալը կամ իմ պետության որևէ պաշտոնյա ինչ-որ անհայտ ծագում ունեցող քաղաքագետների կամ քաղաքական գործիչների մեկնաբանություններ տա։ Կա Ռուսաստանի պաշտոնական դիրքորոշումը։ Ռուսաստանի Դաշնության հարգարժան դեսպան Իվան Վոլինկինը շատ հստակ, հավասարակշռված գնահատական է տվել Հայաստանի Հանրապետության և Եվրամիության միջև ստորագրված համաձայնագրին՝ նշելով, որ սա Հայաստանի Հանրապետության ինքնիշխան որոշումն է: Ավելին, մինչ այդ տիկին Զախարովան, որը արտաքին գործերի նախարարության պաշտոնական ներկայացուցիչն է, նշել է, մեջբերում եմ, որ «հարգանքով եմ վերաբերվում Հայաստանի Հանրապետության ինքնիշխան որոշմանը»: Ինչի՞ մասին է խոսքը», – նշել է Շարմազանովը։
Загружается новость ...
"Право"
«ԵՄ–ի հետ համաձայնագիրը չի հակասում հայ–ռուսական դաշնակցային հարաբերություններին։ Ավելին, մենք կշարունակենք խորացնել դաշնակցային հարաբերությունները Ռուսաստանի հետ քաղաքական, տնտեսական, հումանիտար ոլորտներում և հնարավոր այլ ուղղություններով», – ասել է Շարմազանովը։
Նա նաև ընդգծել է, որ Երևանը կշարունակի ընդլայնել իր մասնակցություն ԵՏՄ–ում և ՀԱՊԿ–ում։
«ԵՏՄ–ի անդամակցությունն էական նշանակություն ունի մեզ համար, քանի որ դա 180–միլիոնանոց շուկա է, իսկ Ռուսաստանը մեր թիվ մեկ դաշնակիցն է։ Մյուս կողմից, ելնելով սեփական պետական և ազգային շահերից` Հայաստանը կհամագործակցի և կխորացնի քաղաքական երկխոսությունը ԵՄ–ի հետ, ինչն էլ հենց նախատեսում է ստորագրված համաձայնագիրը», – ասել է Շարմազանովը։
Նրա խոսքով, անկախ այն բանից, թե «ինչ կասեն հյուսիսից, հարավից, արևելքից կամ արևմուտքից` Հայաստանը կշարունակի վարել արտաքին քաղաքականություն, որը համապատասխանում է իր ազգային և պետական շահերին»։
«Այս ճանապարհով են գնացել Հայաստանն ու ՀՀԿ–ն` նախագահ Սերժ Սարգսյանի գլխավորությամբ։ Արդյունքն ակնհայտ է. մենք մուտք գործեցինք ԵՏՄ` խորացնելով հարաբերությունները դաշնակից Ռուսաստանի հետ, ինչը չխանգարեց եվրոպացի գործընկերների հետ համագործակցության համաձայնագրի ստորագրմանը», – ասաց Շարմազանովը։–0–
