ԵՐԵՎԱՆ, 2 հունիսի. /Նովոստի–Արմենիա/. Գերմանիայի Բունդեսթագն ընդունեց 1915 թ.–ին Օսմանյան կայսրությունում տեղի ունեցած Հայոց ցեղասպանության ճանաչման բանաձևը, Facebook սոցցանցի իր էջում գրել է ՀՀ ԱԺ մամուլի քարտուղար Արսեն Բաբայանը։
Մայիսի 16–ին Բունդեսթագի քննարկմանն է ներկայացվել բանաձև, որը կոչ է անում ճանաչել Օսմանյան կայսրությունում տեղի ունեցած Հայոց ցեղասպանությունը։ Բունդեսթագը փաստաթուղթը կքննարկի հունիսի 2–ին:
Բունդեսթագի անդամները որոշումն ընդունեցին ծափահարություններով։ Միաժամանակ, այս րոպեներին Բունդեսթագի շենքի առաջ կազմակերպված ակցիայի մասնակիցները, որոնք կողմ են բանաձևի ընդունմանը, որոշումն ընդունեցին ծափահարություններով և հայկական ազգային պարերով։
Բանաձևով ոչ միայն ընդունվում է Հայոց ցեղասպանությունը, այլ նաև նշվում է Գերմանիայի պատասխանատվությունը այդ հանցագործությունների համար։ Մասնավորապես, գերմանական խորհրդարանը ցավում է գերմանական կայսրության ամոթալի դերի համար:
«Որպես Օսմանյան կայսրության գլխավոր ռազմական դաշնակից՝ Գերմանիան, տեղյակ լինելով հայերի հանդեպ ծրագրվող ոճիրի մասին, չի միջամտել կանխելու մարդկության դեմ այդ հանցագործությունը»,- նշվում է բանաձևի տեքստում:
Թուրքիայի վարչապետն անհեթեթ է համարում Բունդեսթագում Հայոց ցեղասպանության բանաձևի շուրջ քվեարկությունը>>
Բանաձևը հերթական խորհրդարանական նստաշրջանի քննարկմանն է ներկայացվել Կանաչների կուսակցության, Գերմանիայի սոցիալ–դեմոկրատական կուսակցության և մի շարք այլ կուսակցությունների պատգամավորների կողմից։ Ինչպես հայտարարել է Կանաչների կուսակցության առաջնորդ Ջեմ Օզդեմիրը, ով նախաձեռնության համահեղինակներից է, «շատ հնարավոր է, որ բանաձևի ներառումը խնդիրներ կառաջացնի Անկարայի հետ հարաբերություններում։ Սակայն Բունդեսթագը թույլ չի տա, որպեսզի պարոն Էրդողանի նման բռնապետը շանտաժի ենթարկի իրենց»։
«Հայերի զանգվածային սպանությունների մասին արտգործնախարարության փաստաթղթերն ավելի քան խոսուն են։ Մեր որոշումից հետո Թուրքիայի համար շատ ավելի դժվար կլինի ժխտել ցեղասպանությունը», – հայտարարել է Օզդեմիրը։
Գերմանիայի սոցիալ–դեմոկրատական կուսակցության առաջնորդ Տոմաս Օպերմանն իր հերթին հայտարարել է, որ Գերմանիան հատուկ պատմական պատասխանատվություն է կրում` որպես Օսմանյան կայսրության նախկին դաշնակից։ «Այս ամենն ընդհանրապես կախված չէ ընթացիկ քաղաքական բանավեճից փախստականների հետ կապված ճգնաժամային իրավիճակում։ Դեմ եմ հնազանդությանն Էրդողանի հետ հարաբերություններում», – հայտարարել է Օպերմանը։
Նախորդ տարվա ապրիլին Բունդեսթագը ձայների ճնշող մեծամասնությամբ արդեն հավանություն տվել էր մի բանաձևի, որում Օսմանյան կայսրությունում տեղի ունեցած հայերի զանգվածային սպանությունը բնութագրվել է որպես Ցեղասպանություն։
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը։ -0-