ԵՐԵՎԱՆ, 5 դեկտեմբերի. /Նովոստի–Արմենիա/. Այսօր տեղի կունենա հայտնի դեբատը՝ ընտրություններին մասնակցող լիդերների միջև, գրում է «Հրապարակը»։
«Բոլոր 11-ն էլ այս պահի դրությամբ նամակով իրենց համաձայնությունը հայտնել են. որևէ կուսակցություն կամ դաշինք այլ դիտարկում, նկատառում չի հայտնել»,- օրաթերթին հայտնել է Հ1-ի տնօրեն Մարգարիտա Գրիգորյանը:
Ըստ նրա՝ նախատեսվել է, որ դեբատը կտևի 2,5-3 ժամ, կսկսվի երեկոյան հիմնական լուրերի թողարկումից հետո:
«Բայց քանի որ առաջին անգամ ենք նման բաց բանավեճ անցկացնելու, մասնագետներն էլ կարծում են, որ 11 գործչի դեպքում հնարավոր է և ասելիքը երկար լինի, կփորձենք ավելի ճկուն լինել ու անհրաժեշտության դեպքում բանավեճին ֆորմատից ավել՝ ևս կես ժամ տրամադրել», – նշել է նա։
Նախատեսվել է, որ դեբատը կվարեն Արմեն Դուլյանը և Քրիստինե Մելքոնյանը, Պատասխանելով օրաթերի այն հարցին, թե ինչու՞ դեբատը չի վարելու Պետրոս Ղազարյանը` Գրիգորյանը նշել է, որ հաղորդումը կազմակերպելու, բանավեճը հնարավորինս սահուն կազմակերպելու համար թրեյնինգներ է անում հասարակական կազմակերպություններից մեկը, նրանք խորհուրդ են տվել, որ բանավեճի մոդերատորները լինեն կին և տղամարդ:
Դեբատի սկզբում 11 գործիչներն ասելու են իրենց ողջույնի խոսքը, մոդերատորների միջամտությունը քիչ է լինելու, մասնակիցները միմյանց հարցեր կտան, պատասխաններ կհնչեն, սկզբի համար մեկ-երկու՝ կոռուպցիայի, տնտեսության մասով հարցեր կլինեն:
Անդրադառնալով անվտանգության լրացուցիչ միջոցներին, Գրիգորյանը նշել է, որ քարոզչական մթնոլորտն առանց այն էլ բավականին թեժ է, իսկ 11 մասնակցի դեպքում այն ընդհանրապես կարող է «հրդեհ» առաջացնել:
«Մենք ունենք անվտանգության հնարավորություն միայն մուտքի և ելքի համար, այլ հնարավորություններ չունենք, և ապա՝ չեմ կարծում, որ մեր քաղաքական գործիչների բանականությունը կհատի թույլատրելիության սահմանը, ցայս մեր տաղավարում կազմակերպված բանավեճերի ժամանակ կոռեկտությունը խստագույնս պահպանվել է», – ասել է Գրիգորյանը։–0–
