ԵՐԵՎԱՆ, 13 հոկտեմբերի./Նովոստի-Արմենիա/. ՊՆ ներկայացուցիչ Արծրուն Հովհաննիսյանը երեքշաբթի ճեպազրույցի ժամանակ օպերատիվ տվյալներ է ներկայացրել առաջնագծից և պատմել է Ադրբեջանի ԶՈւ-երի նոր ռազմավարության մասին:
«Վաղ առավոտյան Ադրբեջանի զինված ուժերը Արցախի սահմանի գրեթե ողջ երկայնքով լայնամասշտաբ հարձակողական գործողություններ են սկսել՝ առնվազն երեք-չորս ուղղություններով, հատկապես թեժ է եղել հյուսիսային ուղղությունը, որտեղ օրվա ընթացքում թեժ մարտեր են տեղի ունեցել։ Ծավալուն հրետակոծությունից հետո անցել են լայնամասշտաբ հարձակման՝ զրահատեխնիկայի կիրառմամբ»,- նշել է Հովհաննիսյանը:
ՊՆ ներկայացուցիչը նշել է, որ այսօր երևի ողջ պատերազմի ընթացքում ամենաթեժ մարտերից մեկն է եղել: «Այդ ընթացքում մեր ստորաբաժանումներին հաջողվել է հակառակորդին հետ շպրտել՝ պատճառելով էական կորուստներ։ Այս ընթացքում ԶՈւ-երի կանոնավոր բանակի, պահեստազորի, աշխարհազորի միասնական, համատեղ, փայլուն հերոսական գործողությունների շնորհիվ հաջողվել է կասեցնել հակառակորդի հարձակողական գործողությունները»,- հայտնել է Հովհաննիսյանը:
Նա նշել է, որ մնացած ուղղություններում մարտական գործողությունները նույնպես շարունակվել են։
«Հակառակորդը որևէ էական առաջխաղացում չունի: Ադրբեջանի զինված ուժերը որդեգրել են հետևյալ քաղաքականությունը․ հետախուզադիվերսիոն գործողություններով մերձռազմաճակատային տարբեր բնակավայրերում արագ ներթափանցումներ և տեղեկատվական ակցիաներ իրականացնել՝ դրոշներ պարզելով տարբեր շենքերի վրա, նկարվել՝ առաջին հերթին իրենց, ապա մեր հասարակության վրա հոգեբանական ազդեցություն ունենալու համար»,- հայտնել է Հովհաննիսյանը:
Նա ընդգծել է, որ արդեն բավականին ժամանակ մարտական գործողությունների ընթացքում կոտրելով սեփական ԶՈւ-երի մեծ ներուժը, հարձակողական մարտերում նշանակալի, էական առաջընթաց ու հաջողություններ չունենալով Ադրբեջանի հասարակությանը պետք է կերակրել նման տեղեկատվություններով։
«Ըստ էության, 14-15 օրվա ընթացքում մեկ գնդի խնդրի ծավալով առաջխաղացում ապահոված ադրբեջանական 3-4 բանակային կորպուսները մեծ հաշվով մեծ գովելու բան չունեն։ Ցանկացած միջազգային ռազմական փորձագետ կհաստատի իմ ասածը։ Դրանից հետո ոչինչ չի մնում, բացի նրանից, որ դիվերսիոն խմբերն արագ ներթափանցումներ կատարեն տարբեր բնակավայրեր, տարբեր շինությունների մոտ նկարվեն եւ հետո ներկայացնեն տվյալ շինությունները որպես այս կամ այն գյուղի կամ քաղաքի գյուղապետարան կամ քաղաապետարան»,- նշել է Հովհաննիսյանը:
Նրա խոսքով, նման իրավիճակ է ստեղծվել և Հադրութի մոտակայքում, քանի որ հակառակորդն օգտագործում է անտառային և լեռնայն բնակավայրերի առանձնահատկությունները:
«Չի բացառվում դիվերսին խմբերի ժամանակ առ ժամանակ ներթափանցումը Հադրութ և մոտական բնակավայրեր»,- հայտնել է նա՝ նշելով, որ զորքերը պայքար են մղում այդ ուղղությամբ: -0-