Եռակողմ հայտարարության համաձայն, Լաչինի միջանցքի վերաբերյալ իրավական պարտավորություններ են դրված Ադրբեջանի և Ռուսաստանի վրա. Փաշինյան

ԵՐԵՎԱՆ, 10 հունվարի./Նովոստի–Արմենիա/. 2020 թվականի նոյեմբերի 9-ի եռակողմ հայտարարության 6-րդ կետով Լաչինի միջանցքի վերաբերյալ իրավական պարտավորություններ են դրված Ադրբեջանի Հանրապետության և Ռուսաստանի Դաշնության վրա, հայտարարեց ՀՀ վարչապետ Նիկոլ Փաշինյանը երեքշաբթի ասուլիսի ժամանակ։

«Եթե ուշադրություն եք դարձրել, եռակողմ հայտարարության 6-րդ կետում, որը վերաբերում է Լաչինի միջանցքին, Հայաստանի Հանրապետության վերաբերյալ որևէ ձևակերպում չկա», – ընդգծեց նա։


Փաշինյանը նաև մեկնաբանեց շրջանառվող լուրերն այն մասին, թե Հայաստանը Ռուսաստանի առջև վերջնագիր է դրել, որ եթե մինչև հունվարի 10-ը Լաչինի միջանցքը չբացվի, Հայաստանը դուրս կգա ՀԱՊԿ-ից։

«Ես չեմ կարծում, թե մենք մեր գործընկերների հետ պետք է վերջնագրերի լեզվով խոսել. Այն, ինչ ունենք ասելու տվյալ իրադրության հետ կապված, արդեն ասվել է, և մեծ հաշվով ավելացնելու բան չկա: Նաև հրապարակային գնահատականներ են տրվել Լաչինի միջանցքը փակելու փաստին», – ասաց նա։

Փաշինյանը նաև նշեց, որ ինչ տեղի է ունենում Լաչինի միջանցքում, առաջին հերթին, ԼՂ ժողովրդին, ԼՂ հայությանը, սեփական հայրենիքում ապրելու կամքը կոտրելու նպատակ ունի, և «սա է ամենակարևոր կոնտեքստը, որը մենք պետք է հաշվի առնենք»:–0–