Վաղը Բրատիսլավայում պետք է տեղի ունենար հանդիպում Ադրբեջանի և Արցախի ներկայացուցիչների միջև, սակայն Ադրբեջանը հրաժարվել է. Տիգրան Պետրոսյան (ՎԻԴԵՈ)

ԵՐԵՎԱՆ, 31 հուլիսի./Նովոստի–Արմենիա/. Վաղը` օգոստոսի 1–ին. Բրատիսլավայում պետք է տեղի ունենար հանդիպում Ադրբեջանի և Արցախի ներկայացուցիչների միջև, սակայն Ադրբեջանը հրաժարվել է այդ հանդիպումից։

Այս մասին տեղեկացրեց Արցախի Հանրապետության նախագահին կից հակաճգնաժամային խորհրդի նախագահ Տիգրան Պետրոսյանը Facebook–յան իր էջում։

«Դուք գիտեք, որ Բաքուն արդեն մի քանի անգամ է փորձում է պարտադրել, որ Արցախից մարդ գնա Բաքու կամ Եվլախ, այսպես կոչված, բանակցությունների: Եթե նրանք այդպիսի բան են պարտադրում, ես պատկերացնում եմ, ինչպիսի խոսակցություն է տեղի ունենալու: Այս ֆոնին Եվրոպան և ԱՄՆ-ն փորձ են կատարում հանդիպում կազմակերպել այլ երկրում` երրորդ երկրում: Օգոստոսի 1-ին պետք է տեղի ունենար հանդիպում նախնական Սոֆիայում, Արցախի և Ադրբեջանի հասարակական կազմակերպությունների միջև: Հետո Ռուսաստանն, այդ ամենը իմանալով, խաղի մեջ մտավ, փորձեց առաջ անցնել և ամսի 25-ին Լավրովը (ՌԴ ԱԳ նախարար, խմբ.) հանդիպում է կազմակերպել, որի ընթացքում նա մեզ կոչեց «ազգային փոքրամասնություն», որն անընդունելի է և ցույց տվեց ՌԴ իշխանության այսօրվա քաղաքականությունը», - ասաց Պետրոսյանը:

Նա նշեց, որ այդ ֆոնին ԱՄՆ-ի և Եվրոպայի միջնորդությամբ ֆորմատը փոխվեց, և ամսի 1–ին` վաղը, Բրատիսլավայում պետք է տեղի ունենար հանդիպում Ադրբեջանի և Արցախի ներկայացուցիչների միջև, սակայն երեկ չառաջի օրը Ադրբեջանը հրաժարվել է այդ հանդիպումից` առանց պատճառաբանության։

«Վաղը կամ մյուս օրը դրսի ներկայացուցիչները կժամանեն Երևան և կլինեն որոշ քննարկումներ։ Քննարկումները կավարտվեն, ես կներկայացնեմ, թե ինչ առաջարկներ, ինչ քննարկումներ են տեղի ունեցել Արևմուտքի կողմից մեզ հետ», – ասաց Պետրոսյանը։
ԱՀ նախագահին կից հակաճգնաժամային խորհրդի նախագահի խոսքով՝ իրենք այս պահին սպասում են ԱՄՆ-ի և Եվրոպայի առաջարկներին, դրանք ի մի կբերեն և նոր կորոշեն անելիքները։–0–